बसन्त खड्का, सन्धिखर्क ।
“राष्ट्रियता, गणतन्त्र र धर्मनिरपेक्षताको रक्षा गरौँ, सङ्घीयता र एमसिसी खारेज गरौँ” मूल नाराका साथ अर्घाखाँची जिल्लाको अर्घाविहारमा सभा सम्पन्न भएको छ ।
राष्ट्रिय जनमोर्चा सन्धिखर्क नगर समितिको आयोजनामा २०८१ माघ १९ गते शनिबार सो कार्यक्रम सम्पन्न भएको हो ।
सभाका प्रमुख वक्ता तथा राष्ट्रिय जनमोर्चाका प्रदेशसभा सदस्य एवम् जिल्ला अध्यक्ष थम्मन केसीले सङ्घीयता नेपालका लागि बोझ मात्रै साबित भएकाले यसलाई खारेज गरी प्रजातान्त्रिक विकेन्द्रीकरणमार्फत स्थानीय तहलाई बलियो बनाउनुपर्नेमा जोड दिनुभयो ।
उहाँले सङ्घीयता खारेज तथा एमसिसीको विरोधमा हुने काठमाडौँकेन्द्रित आन्दोलनमा सशक्त सहभागिता जनाउन सम्पूर्ण जनता तथा पार्टी कार्यकर्तालाई आह्वान गर्नुभयो ।
सभामा अखिल नेपाल किसान महासङ्घ (अप्फा) अर्घाखाँचीका अध्यक्ष जीवनारायण खनाल, राजमो अर्घाखाँचीका सचिवालय सदस्य भीमलाल आचार्य, अखिल नेपाल युवक सङ्घ अर्घाखाँचीकी सदस्य रिता पुन र राजमो सन्धिखर्क नगर समितिका सहसचिव वसन्त खड्काले पनि मन्तव्य राख्नुभएको थियो ।
कार्यक्रममा अखिल नेपाल ट्रेड युनियन महासङ्घ (अन्टुक) का उपाध्यक्ष गोबिन्द बिसी, राजमो अर्घाखाँचीका सदस्य दिलदार हुसेन, अखिल नेपाल महिला सङ्घ अर्घाखाँचीकी सदस्य शारदा आचार्य, अखिल नेपाल जनजाति सम्मेलन अर्घाखाँचीका अध्यक्ष जनक पुन, युवक सङ्घ अर्घाखाँचीका कोषाध्यक्ष भुपाल बिसी र रक्तिम सांस्कृतिक अभियान अर्घाखाँचीका सदस्य सन्तोष सुनारलगायत नेताकार्यकर्ताको उपस्थिति रहेको थियो ।
कार्यक्रमको अध्यक्षता राजमो ९ नं. वडासमितिका अध्यक्ष अमर कार्कीको रहेको थियो भने स्वागत मन्तव्य रामचन्द्र भुसालले र सञ्चालन नगर उपाध्यक्ष रुद्रप्रसाद पराजुलीले गर्नुभएको थियो ।
कोणसभामा राजमो जिल्ला नेतृत्वका साथै विभिन्न मोर्चाको सशक्त उपस्थिति देखिनुका साथै स्थानीय जनता तथा कार्यकर्ताको उत्साहजनक सहभागिता रहेको थियो ।
