काठमाडौँ । अखिल नेपाल महिला सङ्घकी अध्यक्ष मीना पुनले सङ्घीयताको खारेजी कुनै पार्टीविशेषको नभएर समग्र राष्ट्रको एजेन्डा भएको दाबी गर्नुभएको छ ।
राष्ट्रिय जनमोर्चा काठमाडौँद्वारा २०८१ माघ १२ गते शनिबार नागार्जुन नगरपालिकाको फस्कुचोकमा आयोजित सभामा मन्तव्य राख्दै उहाँले सो दाबी गर्नुभएको हो ।
सम्बोधनको क्रममा उहाँले सङ्घीयताका कारणले देशको आर्थिक अवस्था कमजोर हुनुका साथै राष्ट्रिय विखण्डनको अवस्था उत्पन्न भएको बताउनुभयो ।
‘हाम्रो देश आर्थिक रूपमा पहिलेदेखि नै कमजोर थियो । अर्कातिर, देशमा विभिन्न जातजाति र धर्मावलम्बीको मिश्रित बसोबास छ’ उहाँले भन्नुभयो– ‘सङ्घीयता लागु गर्ने प्रयास भएदेखि देश झन् बढी आर्थिक रूपमा दुर्बल भएको छ र राष्ट्रिय विखण्डनको अवस्था उत्पन्न भएको छ ।’
सङ्घीय संरचना पाल्नका लागि देशमा करआतङ्क कायम भएको बताउँदै उहाँले प्रश्न गर्नुभयो– ‘नेपाली जनतासित कर उठाएर सङ्घीयता कति दिन पाल्ने हो र जनताले के पाएका छन् ?’
देशमा विकास, निर्माण र रोजगारीको अवसर नभएकाले हजारौँ युवा विदेशिनुपरेको बताउँदै उहाँले सङ्घीयताका कारण देशमा सरकार भएको महसुस नभएको बताउनुभयो ।
‘देशमा आठओटा सरकार छन् तर हजारौँ युवा विदेशिने गरेका छन्’ उहाँले भन्नुभयो– ‘जनताले सरकार भएको महसुस नै गर्न सकेका छैनन् ।’
उहाँले कृषिप्रधान देशमा कृषिक्षेत्रमा लगानी नहुँदा पनि नेपाली युवाको विदेश पलायन भइरहेको धारणा राख्नुभयो ।
महिलानेतृ पुनले सङ्घीयता खारेजीका लागि चैत २४ देखि ३० गतेसम्म आयोजित काठमाडौँकेन्द्रित आन्दोलनमा सम्पूर्ण जनतासित सहभागिता र सहयोगका लागि अपिलसमेत गर्नुभयो ।
नेकपा (मसाल) ३ नं. प्रदेश ब्युरो प्रवक्ता समीर सिंहको सञ्चालनमा अघि बढेको उक्त सभाको अध्यक्षता राजमो नागार्जुन पालिका समितिका अध्यक्ष केबी घलेले गर्नुभएको थियो ।
