काठमाडौँ । नेकपा (मसाल) काठमाडौँका प्रवक्ता जगतप्रसाद रेग्मीले सङ्घीयता नेपालको विकासका लागि आएको भन्नु भ्रम भएको बताउनुभएको छ ।
राष्ट्रिय जनमोर्चा काठमाडौँले २०८१ माघ १२ गते शनिबार स्वयम्भुचोकमा आयोजित सभालाई सम्बोधन गर्दै उहाँले यस्तो धारणा व्यक्त गर्नुभएको हो ।
‘यहाँ भ्रम फिँजाइएको छ, सङ्घीयता नेपालको विकासका लागि आएको हो’ उहाँले भन्नुभयो– ‘सङ्घीयता कार्यान्वयनको दश वर्षले धेरै कुरा बताइसकेको छ र त्यो भ्रम हो भन्ने प्रमाणित भएको छ ।’
प्रवक्ता रेग्मीले नेपाली जनताले सङ्घीयतालाई विकासको कारण मान्ने नगरेकै कारण यसअघिका कुनै पनि आन्दोलनको एजेन्डा सङ्घीयता बन्न नसकेको बताउनुभयो ।
‘सङ्घीयता नेपालीलाई चाहेर आएको होइन, यो त भारत र युरोपियन युनियनलाई चाहिएर आएको हो’ उहाँले भन्नुभयो– २०६३ सालतिर भारतका ज्वाइँ र भान्जाहरूको आन्दोलन प्रायोजित गरेर सङ्घीयता भित्र्याइएको हो ।’
आर्थिक रूपमा कमजोर र इतिहासदेखि नै विभिन्न जातजाति मिलेर बसेको देशमा सङ्घीयता भित्र्याइएको बारेमा उहाँको भनाइ थियो– ‘सङ्घीयता नेपालको विनाशका लागि ल्याइएको हो ।’
उहाँले सङ्घीयता खारेज गर्न नसके देश टुक्रिन सक्ने बताउँदै सग्लो देश कायम राख्नका लागि अहिलेदेखि नै सम्पूर्ण देशभक्त शक्तिहरू एकजुट हुनुपर्ने बताउनुभयो ।
‘सिक्किमजस्तै देशै रहेन भने राजनीतिक पार्टीको के अर्थ ? त्यसैले अहिले नै सचेत हुन म नेपाली जनतासित अपिल गर्दछु’ उहाँले भन्नुभयो ।
राजमो काठमाडौँका अध्यक्ष झविन्द्र भुसालको अध्यक्षतामा अघि बढेको उक्त कार्यक्रमको सञ्चालन सचिव छवि खनालले गर्नुभएको थियो ।
