मोहनविक्रम सिंह ##

१. मसानघाट

यो मसानघाट हो
तर यहाँ मरेका होइन
ज्युँदा लाशहरू आउँछन्
मुर्दाहरू रुने गर्छन्,
मलामीहरू हाँसिरहेका हुन्छन्

(२०२५ असोज २४ गते; हनुमानढोका, काठमाडौँ)

२. जीवन के हो ?

जीवन के हो ?
कोइलीको कुँहुँकुँहु,
झरनाको झर्झर वा
“दालभात–डुकु” 

(२०२६ जेठ २६ गते; सेन्ट्रल जेल, काठमाडौँ)

३. तिम्रो हाँसो

डुब्न थालेको सूर्यलाई हेरेर किन हाँस्छौँ ?
एकपल्ट अस्ताएको सूर्य
अर्को बिहान पूर्वमा उदाइरहन्छ
तर तिम्रो हाँसो एकपल्ट अस्ताएपछि
सधैंँका लागि
पश्चिमको क्षितिजमा डुब्ने छ

(२०२६ जेठ २९ गते; सेन्ट्रल जेल, काठमाडौँ)

४. जीवनरेखा

बादलको प्रत्येक टुक्राले
जीवनको रेखालाई मेटिदिन खोज्छ
हावाको प्रत्येक झोँकाले
टुटेको तारलाई जोडिदिन्छ

(२०२६ असार १ गते; सेन्ट्रल जेल, काठमाडौँ)

५. क्रान्तिप्रति

त्यो पहाड कहिलेदेखि तिमीलाई
पर्खेर बसिरहेको छ
त्यो नदी कहिलेदेखि तिमीलाई
भेट्याउन दौडिरहेको छ
धर्तीतिर फर्केर हेर त
युगयुगदेखि कति कामनाहरू
तिम्रै प्रतीक्षामा खण्डहर बनिसकेका छन्

(२०२६ असार २ गते; सेन्ट्रल जेल, काठमाडौँ)

६. सहिदप्रति

राम्रै भयो,
तिमी मरेर गयौ
नत्र आज तिम्रो ज्युँदो लासले
भूगोल पार्कको परिक्रमा गरिरहेको हुन्थ्यो कि ?

(सहिद दिवस, २०२६ माघ १६ गते; भद्रगोल जेल, काठमाडौँ)

७. प्रजातन्त्र

तोपको गड्गडाहटले जनायो–
फागुन ७ गते आयो
तर प्रजातन्त्र कहाँ छ ?
बारुदको धुँवामा
वा फलामको पिञ्जरामा ?

(“प्रजातन्त्र” दिवस २०२६; भद्रगोल जेल, काठमाडौँं)

८. सूर्य

सूर्य उदाउँछ,
सूर्य अस्ताउँछ
उदाउँछ, अस्ताउँछ
तर प्रत्यक पल्ट पश्चिममा अस्ताउँदा
यो बताएर जान्छ कि
भोलि त्यो फेरि पूर्वमा उदाउने छ

(२०२६ चैत; भद्रगोल जेल, काठमाडौँ)

९. टुटेका आशा

मेरा टुटेका आशाहरू
बादलका टुक्रामा गएर मिलेका छन्,
सुकेका आँसुका थोपाहरू
आगोमा मुस्लोमा

(२०२७ वैशाख ३ गते, भद्रगोल जेल, काठमाडौँ)

१०. आत्मसमर्पण

मलाई आत्मसमर्पण गर्न भन्नेहरूलाई
मैले कसरी सम्झाऊँ कि
मैले धेरै पहिले नै
सम्पूर्ण रूपमा आफूलाई
क्रान्तिको वेदीमा होमिसकेको छु
अब पुनः समर्पण गर्नका लागि
मसित न जीवन बचेको छ, न मृत्यु झ्
न हाँसो बचेको छ, न आँसु…

(२०२७ वैशाख ३ गते; भद्रगोल जेल, काठमाडौँं)

११. ताण्डवनृत्य

यहाँ ताण्डवनृत्य भइरहेको छ
मृत्यु हाँसिरहेको छ
जीवन रोइरहेको छ

(२०२७ वैशाख १४ गते; भद्रगोल जेल, काठमाडौँ)

१२. मेरो “अपराध”

मेरो “अपराध” यही भयो कि
मैले अस्ताउन थालेको सूर्यको विम्बमा
सूर्योदयको प्रतिविम्ब देखेँ

(२०२७ वैशाख ६ गते; भद्रगोल जेल, काठमाडौँ)

१३. युगनृत्य

वर्षाको झर्झरमा मैले
युगको नृत्य देखेको छु
ढुकुरको कुर्कुरमा मैले
तुफानको सङ्गीत सुनेको छु

(२०२७ वैशाख; भद्रगोल जेल, काठमाडौँ)

१४. इस्पातको टुक्रा

जेलका ती पर्खाल र फलामको सिक्रीले
आज विश्वास नगरे
भोलि मेरो लासले
उनीहरूलाई बताइदिने छ :
मेरो हृदय
इस्पातको टुक्राको
बनेको रहेछ वा
घामछायाको ?

(२०२७ वैशाख २५ गते; भद्रगोल जेल, काठमाडौँ)