काठमाडौं । रक्तिम सांस्कृतिक अभियानले अभिनेत्री मनिषा कोइराला विरुद्ध भारतीय सञ्चारमाध्यमले गालीगलौजपूर्ण समाचार सम्प्रेषण गरेको भन्दै आपत्ति जनाएको छ ।
अध्यक्ष रेम रानाले बिहीबार एक विज्ञप्ति प्रकासित गरी ‘खाती भारतकी गाती चीनकी’ भन्दै समाचार सम्प्रेषण गर्नु आपत्तिजनक भएको बताउनुभएको छ ।
यस्तो छ वक्तव्यः
‘अभिनेत्री मनिषा कोइरालाका विरुद्ध भारतीय मिडियाहरूले व्यापक रूपले आक्रमण गरेर समाचार सम्प्रेषण गरिरहेका छन् । मनिषा कोइरालाले परराष्ट्रमन्त्री प्रदीप ज्ञवालीले नेपालको नयाँ नक्सा पारित भएकोसम्बन्धी गरेको ट्वीटलाई रि–ट्वीट गर्दै ‘हाम्रो सानो देशको आत्मसम्मान कायम राख्न सफल भएकोमा धन्यवाद ।
अब हामी तीन महान देशहरूबीच शान्तिपूर्ण र सम्मानजनक संवादका लागि आशावादी छौँ’ भनेर ट्वीट गरेकी थिइन् । यही सामग्रीलाई आधार बनाएर भारतीय मिडियाहरूले ‘खाती भारतकी और गाना गाती चीनकी’ भन्नेसम्मको निम्न स्तरको गालीगलौजमा उत्रिएर उनका विरुद्ध समाचार सम्प्रेषण गरिरहेका छन् ।
मनिषा कोइरालाले आफ्नो देश नेपालप्रति व्यक्त गरेको भावनालाई हामी सम्मान गर्दछौँ । संसारका कुनै पनि मुलुकमा कुनै पनि नेपालीले कुनै पेशा वा व्यवसायलाई अँगालेर आफ्नो आफ्नो प्रतिष्ठा निर्माण गर्न सक्दछन् । तर त्यसप्रकारको प्रतिष्ठा जहाँ गएर निर्माण गरेपनि उनीहरूको देश नेपाल हुन्छ र आफ्नो देशभक्ति भावना प्रकट गर्न पाउँदछन् ।
यो खालि नेपालको सन्दर्भमा मात्र होइन, संसारभरिका मुलुकहरूका नागरिकहरूले पनि आ–आफ्नो मुलुकप्रति गौरव र सम्मान व्यक्त गर्दै आफ्नो देशभक्ति भावनाको परिचय दिने गर्दछन् । स्वयम् भारतका नागरिकहरूले पनि यो कार्य गर्दछन् । अभिनेत्री मनिषा कोइरालालाई पनि आफ्नो देशप्रति सम्मान र कदर गर्न पाउने पूरा अधिकार छ ।
मनिषा कोइराला सिनेमा जगतकी एक स्वतन्त्र र प्रतिष्ठित कलाकार हुन् । त्यसरी भारतीय मिडियाहरू एकजना स्वतन्त्र र प्रतिष्ठित कलाकारप्रति जुन प्रकारले गालीगलौजका साथ व्यक्त भइरहेका छन्, त्यसलाई हामीले गलत मान्दछौँ र उनीहरूको त्यसप्रकारको कार्यका लागि हामी विरोध र भ्रत्र्सना गर्दछौँ ।’
यो पनि हेर्नुहोस्ः
मनिषा कोइरालामाथि खनिए भारतीय मिडिया (भिडियो)
