काठमाडौं । बझाङमा बाटोमै सुत्केरी भएकी महिलाको अस्पताल नपुग्दै ज्यान गएको छ ।
केदारस्युँ गाउँपालिका–१ डुडिलकी २१ वर्षीया सुनिता बोहराले नवजात शिशु जन्माउनासाथ शिशुसहित प्राण त्यागेकी हुन् ।
गर्भवती सुनितालाई आइतबार दिउँसोदेखि प्रसुति व्यथा लागेपनि परिवारले समयमै अस्पताल लगेनन्। राति व्यथाले च्यापेपछि सोमबार बिहान ५ बजे तिर हिँडाएरै अस्पताल लगेका थिए ।
घरबाट करिब १० मिनेटको दुरीमा सुनिताले बाटोमै शिशुलाई जन्म दिइन् । तर, अत्यधिक रक्तश्राव भएपछि आमाछोराको बाटोमै निधन भएको केदारस्युँ गाउँपालिका–१ का वडाध्यक्ष वीरबहादुर भण्डारीले जानकारी दिए ।
उनका अनुसार गाउँपालिकाले गर्भवती महिलाका लागि निःशुल्क एम्बुलेन्स सेवा प्रदान गर्दै आएको छ । त्यहाँ सडक सञ्जाल पनि छ । तर, समयमै खबर नगर्दा र गर्भवतीलाई अस्पताल लैजान ढिला गर्दा आमा र बच्चा दुवैको ज्यान गयो ।
सुनिताका श्रीमान् उमेश मजदुरी गर्न भारत गएका छन् । डेढ वर्षअघि बिहे गरेका उमेशले पहिलो सन्तानको रुपमा छोरा घर भित्र्याउन पाएनन् न त अन्तिम अवस्थामा श्रीमतीको अनुहार हेर्न पाए ।
