बसन्त खड्का, सन्धिखर्क ।
राष्ट्रिय जनमोर्चाका महासचिव मनोज भट्टले हालसालै विकसित घटनाक्रमलाई हेर्दा वर्तमान सरकारको आयु समाप्त हुन लागेको आशङ्का व्यक्त गर्नुभएको छ ।
राजमो अर्घाखाँचीले २०८१ पुस २३ गते मङ्गलबार सन्धिखर्कमा आयोजना गरेको पत्रकार सम्मेलनमा मन्तव्य राख्दै उहाँले सरकारको स्थिरतामाथि शङ्का गर्नुभएको हो ।
उहाँले केपी ओलीको सरकार टिक्छ भनेर चर्चा गरिरहनु र शेरबहादुर देउवाले धोका नदिने आश्वासन दिनु जस्ता गतिविधिले सरकारभित्र खिचडी पाकिरहेको दाबी गर्नुभयो ।
गत ९ वर्षमा नेपालमा ११ ओटा सरकार परिवर्तन भइसकेको र हालका घटनाक्रमले फेरि सरकार ढल्ने सम्भावना प्रबल भएको उहाको भनाइ थियो ।
महासचिव भट्टले सरकार र छिमेकी राष्ट्रबिचको सम्बन्धमा दुरी बढेको भन्दै चिन्ता व्यक्त गर्नुभयो । बारम्बार हुने सरकार परिवर्तनले विदेशी हस्तक्षेपलाई निम्त्याउने खतरा रहेको तर्क पनि उहाँको थियो ।
तराईमा मधेसवादी दललाई भारतीय साम्राज्यवादका एजेन्टको रूपमा व्याख्या गर्दै उनले उनीहरूको एकताले राष्ट्रिय सार्वभौमसत्ता र एकतामाथि खतराको सङ्केत दिएको बताउनुभयो ।
उहाँले गणतन्त्र विरोधी शक्तिहरू सक्रिय हुँदै गएको र गणतन्त्रको भविष्यमा सङ्कट उत्पन्न गरिरहेको पनि उल्लेख गर्नुभयो । भारतले मात्र होइन, हाल अमेरिकाले समेत नेपालको आन्तरिक राजनीतिमा हस्तक्षेप बढाएको र राज्यका विभिन्न तहमा घुसपैठ गरेको उहाँको दाबी थियो ।
महासचिव भट्टले सहकारी क्षेत्रमा झन्डै दुई खरब रुपैयाँको अपचलन भएको र जनताको पसिनाको कमाइमा माफियाले रमाइरहेको आरोप लगाए । सरकारले २९ सहकारीलाई समस्याग्रस्त माने पनि वास्तविक रूपमा झन्डै ७०० सहकारी सङ्कटग्रस्त रहेको उनको भनाइ थियो ।
रवि लामिछानेको सहकारी काण्डलाई राजनीतिक रङ दिनु खेदजनक भएको भन्दै उनले त्यसप्रति असन्तुष्टि व्यक्त गर्नुभयो ।
राष्ट्रिय जनमोर्चाले चैत २४ देखि ३० गतेसम्म राजधानीकेन्द्रित आन्दोलनको घोषणा गरेको जानकारी दिँदै उहाँले सङ्घीयताको खारेजी, गणतन्त्रको रक्षा, भ्रष्टाचार उन्मूलन र सुशासनका लागि आन्दोलन गर्ने बताउनुभयो ।
