काठमाडौँ । चीनको तिब्बत सिगात्सेमा २०८१ पुस २३ गते मङ्गलबार बिहान ६ः५१ मा गएको भूकम्पमा परी मृत्यु हुनेको सङ्ख्या ९५ पुगेको छ भने १३० जना घाइते भएका छन् ।
तिब्बतस्थित क्षेत्रीय बिपत् राहत मुख्यालय स्रोतका अनुसार भूकम्पबाट ज्यान गुमाउने सङ्ख्या ९५ पुगेको हो ।
समाचार एजेन्सी सिन्ह्वाका अनुसार भूकम्पको केन्द्रविन्दु २८.५ डिग्री उत्तर अक्षांश र ८७.४५ डिग्री पूर्व देशान्तरमा रहेको छ । चीनको सिजाङ प्रान्तको सिगात्सेस्थित दिङ्ग्री गाउँमा केन्द्रविन्दु भएर शक्तिशाली भूकम्प गएको थियो ।
भूकम्पको धक्का नेपालमा समेत महसुस भएको थियो । नेपालको भूकम्प मापन केन्द्रले ७ म्याग्निच्युड रेकर्ड राखे पनि चीनको भूकम्प नेटवर्क केन्द्रले ६.८ तीव्रता मापन गरेको छ । भूकम्पको गहिराइ १० किलोमिटर तल थियो ।
चिनियाँ सञ्चार माध्यमका अनुसार भूकम्पका कारण दिङ्ग्री काउन्टीको चाङसुओ क्षेत्रका गाउँमा घर भत्किएका छन् ।
चिनियाँ सेनाले भूकम्पबाट घाइतेको उद्धार गरिरहेको बताइएको छ । उद्धारकार्यमा ३०० जना उद्धारकर्तासँगै मेडिकल स्टाफ र दुईओटा इमरजेन्सी रेन्पोन्स टिम तैनाथ गरिएको मर्निङ पोस्टले जनाएको छ ।
यता, भूकम्पपछि माउन्ट कोमोलाङमा क्षेत्र अस्थायी रूपमा बन्द गरिएको छ । डिङ्ग्री संस्कृति तथा पर्यटन ब्युरोका अनुसार कोमोलाङमा क्षेत्रमा होटल भवन र वरपरको क्षेत्र अस्तव्यस्त रहेको तर पर्यटक तथा कर्मचारी भने सुरक्षित रहेका छन् ।
डिङ्गीमा रहेको चाइनिज एकेडेमी अफ साइन्सेजको किमोलुङ स्टेसनको विद्युत् कटौती भएको छ । मौसम पूर्वानुमान महाशाखाले डिङ्ग्रीको तापक्रम माइनस १८ डिग्री सेल्सियसदेखि शून्यभन्दा तलसम्म रहेको जनाएको छ ।
चीनको भूकम्प नेटवर्क केन्द्रका अनुसार भूकम्प गएको स्थानदेखि २०० किलोमिटर वरपरको क्षेत्रमा विगत पाँच वर्षको अवधिमा तीन म्याग्निच्युडमाथिका २९ ओटा भूकम्प गएको रेकर्ड छ तर आजको भूकम्प सबैभन्दा शक्तिशाली हो ।
