नयाँदिल्ली । भारतका ९२ वर्षीय पूर्वप्रधानमन्त्री मनमोहन सिंहको डिसेम्बर २६, २०२४ राति निधन भएको छ ।
घरमा अचानक बेहोस भएपछि नयाँदिल्लीस्थित अखिल भारतीय आयुर्विज्ञान संस्थान (एम्स) लगिएका सिंहको राती निधन भएको हो ।
उमेरसँग सम्बन्धित स्वास्थ्य समस्याका कारण उहाँको लामै समयदेखि उपचार भइरहेको थियो । बिहीबार घरमा अचानक बेहोस भएका उहाँलाई तुरुन्तै घरमा सामान्य उपचारपछि राति ८ः०६ बजे नयाँ दिल्लीस्थित एम्समा मेडिकल इमर्जेन्सीमा लगिएको थियो ।
‘सबै प्रयासका बाबजुद उहाँलाई बचाउन सकिएन र राति ९ः५१ बजे उहाँलाई मृत घोषित गरियो’ एम्सले जारी गरेको विज्ञप्तिमा भनिएको छ ।
सन् १९३२ मा पन्जाबमा जन्मिएका मनमोहन सिंहले सन् २००४ देखि २०१४ सम्म दुई कार्यकाल भारतको प्रधानमन्त्रीको रूपमा काम गर्नुभएको थियो ।
सन् २००४ को लोकसभा चुनावमा अटल बिहारी बाजपेयी नेतृत्वको एनडिए विरुद्ध कङ्ग्रेसले विजय हासिल गरेपछि उहाँले पहिलोपटक सन् २००४ मा प्रधानमन्त्री पदको शपथ लिनुभएको थियो । उहाँले सन् २००९ देखि २०१४ सम्म दोस्रो कार्यकाल सम्हाल्नुभएको थियो । उहाँले सन् २०१४ मा भारतीय प्रधानमन्त्री नरेन्द्र मोदीलाई जिम्मेवारी सुम्पिनुभएको थियो । (रासस/एएनआई)
