काठमाडौं । राष्ट्रिय जनमोर्चाले सरकारले नीति तथा कार्यक्रममा एमसीसी संसदबाट पारित गर्ने कुरा उल्लेख गरेकोप्रति आपत्ति जनाएको छ । अध्यक्ष चित्रबहादुर केसीले सोमबार एक वक्तव्य प्रकाशित गरी संसदबाट एमसीसी पारित गर्ने नहुनेमा जोड दिँदै त्यो पारित गरिए नीति तथा कार्यक्रम प्रति नै आफ्नो पार्टीको समर्थन नरहने स्पष्ट पार्नुभएको छ ।
यस्तो छ वक्तव्यः
‘नेपाल कम्युनिस्ट पार्टी (नेकपा) सितका हाम्रा गम्भीर प्रकारका सैद्धान्तिक मतभेद तथा सरकारका विभिन्न नीति र कार्यशैलीसित हाम्रो तीब्र मतभेद भएपनि वर्तमान सरकारलाई समर्थन गर्ने हाम्रो नीति रहँदै आएको थियो र त्यो नीति अहिले पनि कायम छ ।
तर नीति र कार्यक्रममा एमसीसीलाई घुसाएर पारित गराउन सरकारले जुन प्रयत्न गरेको छ, त्यस प्रकारको नीति र प्रक्रिया दुबैसित हाम्रो गम्भीर प्रकारको मतभेद छ । त्यो अमेरिकाको इण्डोप्यासिफिक रणनीतिको अंग हो र, त्यसलाई पारित गरेपछि त्यसबाट हाम्रो देशको राष्ट्रियतामा गम्भीर आ“च पुग्नुका साथै हाम्रो देश अमेरिकी साम्राज्यवादको पंक्तिमा उभिन पुग्ने छ र हाम्रो असङ्लग्न परराष्ट्रनीति समाप्त हुनेछ । त्यसैले त्यसलाई अस्वीकार गर्नुपर्दछ भन्ने हाम्रो पार्टीको दृढ मत रहँदै आएको छ र अहिले पनि त्यो मत कायम छ ।
जेहोस्, हाम्रो जोड यो कुरामा छ कि एमसीसीबारे संसदमा बेग्लै छलफल भएर निर्णय हुनुपर्दछ । त्यसो नगरेर नीति र कार्यक्रममा सामेल गरेर त्यसलाई पारित गराउने जुन प्रयत्न भइरहेको छ, त्यो प्रक्रियालाई हामीले गलत मान्दछौं र त्यसको कडा शब्दमा विरोध गर्दछौं ।
हाम्रो माग यो छ कि नीति र कार्यक्रमको एमसीसीसित सम्बन्धित बुँदा नम्बर २११ लाई सरकारले फिर्ता लिनुपर्दछ । यदि नीति र कार्यक्रममा त्यो बुँदालाई यथावत राखेर वा एमसीसीलाई सामेल गरेर संसदद्वारा पारित गराउने प्रयत्न गरेमा हामीले त्यसको विरोध गर्ने छौं र नीति र कार्यक्रममा हाम्रो समर्थन रहने छैन ।’
