प्रकाश छन्त्याल, बरेङ (बागलुङ) ।
सङ्घीयता विरोधी देशव्यापी आन्दोलन कार्यक्रम सफल पार्ने अभियानअनुसार राष्ट्रिय जनमोर्चा बागलुङले जैमिनी नगरपालिकाको कुश्मिसेरामा आमसभा सम्पन्न गरेको छ ।
केन्द्रीय उपाध्यक्ष तथा प्रवक्ता दुर्गा पौडेलको प्रमुख आतिथ्यमा २०८१ पुस १० गते बुधबार उक्त कार्यक्रम सम्पन्न भएको हो ।
कार्यक्रमलाई सम्बोधन गर्दै प्रमुख अतिथि पौडेलले राजमोले गणतन्त्र तथा राष्ट्रियता लागि सङ्घीयता घातक रहेको निष्कर्ष निकालेको बताउनुभयो ।
उहाँले नेपाल जस्तो ऋणी मुलुकमा कुनै पनि दृष्टिकोणले सङ्घीयता उपयुक्त नभएको दाबी गर्नुभयो ।
‘सङ्घीयताका कारण मुलुकमाथि अनावश्यक आर्थिक बोझ थपिएको छ’ उहाँले भन्नुभयो– ‘कथित सङ्घीयता सुदृढीकरणको नाममा विदेशी दातृसंस्थाको सहयोग लिनुपर्ने बाध्यतामा मुलुकलाई पुर्याइएकाले सङ्घीयताको मुख्य पक्ष प्रदेशको शासकीय स्वरूपलाई खारेज गरिनुपर्दछ ।’
फरक प्रसङ्गमा उहाँले राष्ट्रिय जनमोर्चाले नेपाली काङ्ग्रेस र एमालेबिचको सत्तासमीकरणको मुख्य आधार सात बुँदे समझादारीलाई बताइएको पनि स्मरण गराउनुभयो ।
उहाँले भन्नुभयो– ‘सात बुँदे समझदारीले संविधानको संशोधनमा जोड दिएकाले २०६२–६३ सालको ऐतिहासिक जनआन्दोलनका उपलब्धिको रक्षा गर्दै संविधानका नकारात्मक पक्ष सङ्घीयतालगायतका प्रावधान वा सङ्घीयताको मुख्य पक्ष प्रदेशको शासकीय संरचनालाई संविधान संशोधनद्वारा खारेज गरिनुपर्दछ । हिमाल र पहाडबाट छुट्याएर तराईका केही जिल्लालाई मात्र मिलाएर बनाइएका प्रदेश खारेज गरिनुपर्दछ र ती प्रदेशअन्तर्गतका जिल्लालाई हिमाल र पहाडसँग जोडिनुपर्दछ ।’
उहाँले रेमिट्यान्सले धानिएको नेपाल जस्तो मुलुकमा जबरजस्ती सङ्घीयता लाडेर देशका युवायुवतीलाई वैदेशिक रोजगारको बहानामा बिक्री गरेको आरोप लगाउनुभयो ।
त्यस्तै, शिक्षा क्षेत्रमा हस्तक्षेप गर्दै विदेशिने युवा समूहलाई स्वदेशमै राखिराख्न राज्यले ठोस योजना बनाई कार्यान्वपन गर्नुपर्ने आवश्यकतामा जोड दिनुभयो ।
कार्यक्रममा अखिल नेपाल महिला सङ्घकी केन्द्रीय उपाध्यक्ष लक्ष्मी बासकोटा, राजमा बागलुङका अध्यक्ष तिलक थापा, जैमिनी नगरपालिकाका प्रमुख नरबहादुर पुनलगायतले मन्तव्य राख्नुभएको थियो ।
राजमो जैमिनी नगर समितिका अध्यक्ष दिलबहादुर श्रीसको अध्यक्षता तथा नगर समितिका सचिव ठाकुरप्रसाद शर्माको स्वागत र राजमो बागलुङका सचिव भीमलाल पोखरेलको सञ्चालनमा सो कार्यक्रम सम्पन्न भएको थियो ।
कार्यक्रममा जैमिनी नगरपालिकाका दशओटै वडा, छिमेकी बागलुङ नगरपालिका, बरेङ गाउँपालिका, गुल्मीको कालीगण्डकी गाउँपालिकाबाट आम नागरिकको उपस्थिति रहेको थियो ।
