काठमाडौँ । नेकपा (मसाल) ले फनाराम कालाथोकीप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८१ पुस ५ गते शुक्रबार शोकवक्तव्य जारी गर्दै पार्टीले श्रद्धाञ्जली तथा शोकसन्तप्त परिवारप्रति समवेदना व्यक्त गरेको हो ।
यही डिसेम्बर १६, २०२४ का दिन चेन्नैमा निधन भएका कालाथोकी मूल प्रवाह अखिल भारत नेपाली एकता समाजको सदस्य हुनुहुन्थ्यो ।
यस्तो छ, शोकवक्तव्यको पूर्ण पाठ :
“प्युठान जिल्ला स्वर्गद्वारी नपा–६ निवासी कामरेड फनाराम कालाथोकी (का. राज) को १६ डिसेम्बर २०२४ मा भारतको चेन्नैमा मृत्यु भएको छ । हामीले उहाँको मृत्युप्रति गम्भीर दुःख व्यक्त गर्दै सन्तप्त परिवारजनप्रति हार्दिक समवेदना प्रकट गर्दछौँ ।
का. फनाराम कालाथोकी भारतस्थित प्रवासी नेपालीहरूको लोकप्रिय सङ्गठन मूल प्रवाह अखिल भारत नेपाली एकता समाजमा रहेर सामाजिक कार्याकर्ताको भूमिका निर्वाह गर्नुभएको थियो । यसका साथै उहाँले नेकपा (मसाल) का विभिन्न समितिमा रहेर जिम्मेवारी पूरा गर्नुभएको थियो । उहाँ हाम्रो पार्टीको निष्ठाबद्ध र अनुशासित सदस्य हुनुहुन्थ्यो । उहाँको मृत्युबाट हाम्रो पार्टीको आन्दोलनमा गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
