दाङ । इजरायलले प्यालेस्टाइनमा गरिरहेको नरसंहारको विरुद्ध दाङका चार स्थानहरू तुलसीपुर, घोराही, लमही र भालुबाङमा हस्ताक्षर सङ्कलन गरिने भएको छ ।
पाँच वामपन्थी पार्टीको २०८१ पुस ४ गते बिहीबार राष्ट्रिय जनमोर्चाको घोराहीस्थित कार्यालयमा बसेको बैठकले सो निर्णय गरेको हो ।
हस्ताक्षर सङ्कलन अभियान यही पुस ६ गतेदेखि सुरु गरिने निर्णयमा उल्लेख छ ।
सो कार्यक्रम सम्पन्न गर्नका लागि तुलसीपुरमा नेपाल कम्युनिस्ट पार्टीले, घोराहीमा क्रान्तिकारी कम्युनिस्ट पार्टीले, लमहीमा नेकपा (माओवादी केन्द्र) ले र भालुबाङमा राष्ट्रिय जनमोर्चालाई जिम्मा दिइएको छ ।
त्यस्तै, बैठकले तुलसीपुरमा तीन हजार, घोराहीमा तीन हजार, लमहीमा एक हजार पाँच सय र भालुबाङमा एक हजार पाँच सय गरी कम्तीमा नौ हजार हस्ताक्षर सङ्कलन गर्ने निर्णय गरेको उल्लेख छ ।
राजमो केन्द्रीय सदस्य तथा दाङ जिल्ला अध्यक्ष गणेश आचार्यको अध्यक्षतामा बसेको बैठकमा राजमो जिल्ला सचिवालय सदस्य शुक्रराज भण्डारी, जिल्ला समितिका सदस्य मेघराज भट्टराई, नेकपा (माओवादी केन्द्र) का सचिव विश्वराज आचार्य, क्रान्तिकारी कम्युनिस्ट पार्टीका केन्द्रीय सदस्य नवीन खड्का, सोही पार्टीका दीपक विष्ट, नेपाल कम्युनिस्ट पार्टीका केन्द्रीय सदस्य पाटन सी, सोही पार्टीका महान् सी र नेकपा (एकीकृत समाजवादी) का रामप्रसाद चौधरीको उपस्थिति रहेको थियो ।
