काठमाडौं । आज (सोमबार) छुट्टाछुट्टै स्थानमा भएका गाडी दुर्घटनामा परी दुईजनाको ज्यान गएको छ भने ३८ जना घाइते भएका छन् ।
दाङ, मकवानपुर र महोत्तरीमा गाडी दुर्घटना भएको हो ।
दाङमा गाडी दुर्घटना हुँदा २ महिलाको मृत्यु, १२ जना घाइते
दाङमा गाडी दुर्घटनामा दुई जनाको मृत्यु भएको छ ।
पूर्वपश्चिम राजमार्गअन्तर्गत लमही नगरपालिका–९ च्याउखोला बक्सकटिङ नजिकै आज बिहान लु१ज ४२९८ नम्बरको विङ्गर गाडी दुर्घटना हुँदा दुई जनाको मृत्यु भएको हो भने १२ जना घाइते भएको जिल्ला प्रहरी कार्यालय दाङले जनाएको छ ।
मृत्यु हुनुेमा सिवराज नगरपालिका–३ का ४२ वर्षीया प्रिथी थारु र सोही ठाउँका ६० वर्षीया फुलसी थारु रहेको जिल्ला प्रहरी कार्यालयका प्रवक्ता एवं प्रहरी नायब उपरीक्षक ईश्वर थापाले जानकारी दिए।
कपिलवस्तुको चद्रौटाबाट बर्दियातर्फ जाँदै गरेको गाडी आज बिहान दुर्घटनामा परेको थियो।
प्रहरी नायब उपरीक्षक थापाका अनुसार दुर्घटनामा घाइतेको लमही अस्पतालमा उपचार भइरहेको छ।
प्रहरीका अनुसार गाडीमा १४ जना थिए।
तीव्र गतिका कारण गाडी दुर्घटनामा परेको हुनसक्ने प्रहरी नायब उपरीक्षक थापाले जानकारी दिए।
महोत्तरीमा बस दुर्घटना हुँदा २२ जना घाइते
महोत्तरीमा बस दुर्घटना हुँदा २२ जना घाइते भएका छन्। भिठामोड–जनकपुर सडकखण्डमा आइतबार दिउँसो ना४ ख १०९६ नम्बरको बस जलेश्वर नगरपालिका–३, रातोपुलमा पल्टिँदा २२ जना घाइते भएका जिल्ला प्रहरी कार्यालय महोत्तरीले जनाएको छ।
घाइतेमध्ये दुई जनालाई थप उपचारका लागि जनकपुर लगिएको छ। घाइतेमध्ये १५ जना भारतीय नागरिक रहेका प्रहरीको भनाई छ।
चालकले अत्यधिक मदिरा सेवन गरेको कारण बस दुर्घटनामा परेको यात्रुको भनाइ छ। दुर्घटनापछि बस चालकलाई प्रहरीले पक्राउ गरेको छ।
मकवानपुरमा गाडी बिजुलीको पालमा ठोक्किएर भीरबाट खस्यो
यता, मकवानपुरको मनहरीमा आज बिहान स्कार्पिओ दुर्घटना हुँदा चारजना घाइते भएका छन्।
मनहरी गाउँपालिका-९ खरङ्गास्थित पूर्वपश्चिम राजमार्गमा स्कार्पिओ गाडी दुर्घटना हुँदा ४ जना घाइते भएका प्रहरीले जनाएको छ।
आज बिहान ५स्३० बजेतिर बाराको निजगढबाट चितवनतर्फ जाँदै गरेको प्रदेश ३(०१(२२ च ६८६२ नम्बरको स्कार्पिओ गाडी अनियन्त्रित भई सडकको बायाँतर्फ रहेको विद्युतको पोलमा ठोक्किएर झण्डै ५० मिटर तल खसेको मकवानपुर प्रहरीले जनाएको छ।
दुर्घटनाको खबर प्राप्त हुनासाथ ट्राफिक प्रहरी र स्थानीय उद्धार टोली घटनास्थलमा खटिएका थिए।
दुर्घटनामा घाइते भएका चारै जनालाई तत्काल उद्धार गरी मनहरी अस्पताल पुर्याइएको थियो। त्यहाँ प्राथमिक उपचारपछि उनीहरूलाई थप उपचारका लागि भरतपुर, चितवन पठाइएको मकवानपुर प्रहरी प्रवक्ता डीएसपी श्यामु अर्यालले जानकारी दिए।
तीव्र गतिको कारण गाडी अनियन्त्रित भई विद्युतको पोलमा ठोक्किएको हुनसक्ने प्रहरीको अनुमान छ। घटनाबारे थप अनुसन्धान भइरहेको प्रहरीले जनाएको छ।
