काठमाडौं । प्यालेस्टाइनमा इजरायलद्वारा भइरहेको जनसंहारको विरोधमा शनिबार (मंसिर ८ गते) काठमाडौंमा वृहत प्रदर्शन हुने भएको छ ।
प्यालेस्टाइनीमाथि इजरायलबाट भइरहेको जनसंहारविरुद्ध संयुक्त अभियान, नेपालले प्रदर्शन गर्ने भएको हो ।
दिउँसो १ बजे माइतीघर मण्डलामा भेला भएर जुलुशसहित बानेश्वरमा विरोध सभा गर्ने कार्यक्रम रहेको राष्ट्रिय जनमोर्चाका सचिव घनश्याम न्यौपानेले जानकारी दिनुभयो ।
कार्यक्रममा विभिन्न राजनीतिक दल तथा संघसंस्थाका प्रतिनिधिहरूले सम्बोधन गर्नुहुनेछ ।
यस्तै, कार्यक्रममा युद्धविरोधी गीत, कवितालगायत साहित्यिक कार्यक्रमसमेत प्रस्तुत हुनेछ ।
कार्यक्रमलाई राजमोको तर्फबाट उपाध्यक्ष एववम् प्रवक्ता दुर्गा पौडेलले सम्बोधन गर्ने तय भइसकेको छ ।
नेकपा (मसाल), राष्ट्रिय जनमोर्चा, नेकपा (माओवादी केन्द्र), नेकपा (एकीकृत समाजवादी) सहित १४ वटा राजनीतिक दल तथा ८ वटा साम्राज्यवाद विरोधी संघसंस्थाहरूले ‘प्यालेस्टाइनीमाथि इजरायलबाट भइरहेको जनसंहारविरुद्ध संयुक्त अभियान, नेपाल’ नामक बनाएका हुन् ।
सो अभियानले यसअघि पनि विभिन्न चरणमा विरोध प्रदर्शन गर्नुका साथै इजरायली दूतावास र प्रधानमन्त्रीलाई ज्ञापन पत्र बुझाइसकेको छ ।
अभियानले यसपछि प्यलेस्टाइनमाथि भइरहेको ज्यादतीको फोटो प्रदर्शनी, संयुक्त राष्ट्रसंघका महासचिवलाई ज्ञापन पत्र बुझाउने लगायत प्रदेशस्तरमा विरोध प्रदर्शनका कार्यक्रम रहेका छन् ।
