काठमाडौं । दिनको ठिक ११ बजेको छ । काठमाडौंको महाराजगञ्जस्थित नारायणगोपाल चोकमा ग्लोबल आईएमई बैंक छेउमै टाँटिएको टेन्ट अगाडि करिब ४० ५० जना मान्छे जम्मा हुन्छन् । त्यसरी जम्मा हुनेमा बालक, वृद्ध, महिला तथा अपाङ्गहरु पनि सामेल छन् ।
टेन्ट भित्र रहेका केही व्यक्तिहरु टेबुलमाथि प्याकिङ खाना राख्दै अलि टाढा–टाढा बसिदिन आग्रह गर्दैछन् । उनीहरु पालैपालो खाना दिँदै भन्दैथिए– ‘अब खाना आज मात्रै हो, भोलिदेखि नआउनु होला ।’
खाना खान लाइन लागेका व्यक्तिमा हातमा खानाको प्याक परेपछि अनुहार उज्यालो त हुन्छ । तर, भोलिदेखि नआउनु भन्ने शब्दले फेरि निराश बनाउँछ ।
अरिकल इभेन्ट्स प्रालिले सो स्थानमा निशूल्क भोजन वितण गर्न सुरु गरेको आज (शुक्रबार) २५ दिन भयो । ‘हामीले दैनिक ७÷८ सय जनालाई खाना वितरण गरिरहेका छौं । यहाँ भन्दा बाहिर लगेर पनि वितरण गर्छौं’ खाना दिँदै गरेका होम बुढाथोकीले युगदर्शनकर्मीसँग भने, ‘अब नसक्ने अवस्थामा छौं । भोलिदेखि यो कार्यक्रम बन्द हुन्छ ।’
सो स्थानमा बुढाथोकीसहित यज्ञ न्यौपाने, नारायण पन्त, मोहन बहादुर ढकाल र दिपेश बुढाथोकी लगायतका समाजसेवी मिलेर विपन्न वर्गका व्यक्तिलाई खाना खुवाउने कार्यक्रम गरिरहेका हुन् ।
५३ दिनदेखिको लकडाउनका कारण दैनिक काम गरेर खान पाउने कैयौं विपन्न समूदायका व्यक्ति भोकभोकै पर्ने अवस्था छ । यस्ता व्यक्तिलाई कतिपय समाजसेवीहरु मिलेर खाना खुवाउने गरेका छन् । जति लकडाउन लम्बिँदै जान्छ, सहयोगको खाँचो पनि बढ्दै जान्छ । तर, निरन्तर सहयोग गर्नेहरुले अब खाना खुवाउन नसक्ने र सहयोग गर्न नसक्ने बताएपछि उनीहरु थप निराश बन्न थालेका छन् ।
हातमा खानाको प्याक लिएपछि एक वृद्धाले अलिकति खुशी र अलिअलि आशंकित हुँदै भनिन्, ‘आज त खान पाइयो, अब भोलिदेखि के होला ?’
