काठमाडौं । बुटवलको सुप्रिम सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेलाई रुपन्देही लगिएपछि सहकारी पीडितहरू सडकमा आएका छन् ।
आफ्नो बचत फिर्ता पाउनुपर्ने मागसहित उनीहरूले प्रदर्शन थालेका हुन् ।
पूर्वगृहमन्त्री लामिछानेलाई बुटवलको सुप्रिम सहकारी ठगी प्रकरणमा बयान गराउन मंगलबार रुपन्देही लैजाँदा उनका पक्षमा रास्वपाका कार्यकर्ताहरूले प्रदर्शन गरे भने अर्कोतिर सहकारी पीडितहरूले पनि नाराबाजी गरिरहे।
पीडितहरूले कुनै दबाब र प्रभावमा नपरी निष्पक्ष अनुसन्धान हुनुपर्ने र आफ्नो बचत रकम फिर्ता गरिनुपर्ने भन्दै नाराबाजी गरेका थिए।
उनीहरूले ‘सहकारीपीडितलाई न्याय दे’, ‘राजनीतिक संरक्षण बन्द गर’, ‘जनताको पैसा फिर्ता गर’, ‘सहकारी ठगलाई कारबाही गर’, ‘न्याय मार्न पाइँदैन’ जस्ता नारा लगाएका थिए। यिनै नारासहितका तुल, ब्यानर र प्लेकार्ड पनि उनीहरूले प्रदर्शन गरेका थिए।
यसअघि लामिछानेलाई पक्राउ गरी पोखरा लैजाँदा पनि सूर्यदर्शन सहकारीका पीडितहरूले प्रदर्शन गरेका थिए ।
लामिछाने कात्तिक २ गते काठमाडौँबाट पक्राउ परेका थिए। पक्राउलगत्तै उनलाई पोखरा लगिएको थियो। पोखराको सूर्यदर्शन सहकारी ठगी प्रकरणमा पक्राउ परेका उनीमाथि संगठित अपराध र सम्पत्ति शुद्धीकरणको कसुरमा पनि अनुसन्धान भइरहेको छ।
बुटवलको सुप्रिम सहकारी ठगीको आरोपमा २८ जनाविरुद्ध जिल्ला अदालत रुपन्देहीमा यसअघि नै मुद्दा दायर भएको छ। १८ सय २८ जना बचतकर्ताको ८६ करोड १८ लाख २३ हजार ७५४ रुपैयाँ ठगीको आरोप उनीहरूमाथि छ।
अभियोग पत्रमा तत्कालीन गृहमन्त्रीसमेत रहेका राष्ट्रिय स्वतन्त्र पार्टीका सभापति रवि लामिछानेलाई प्रतिवादी नबनाइए पनि उनको नाममा २ करोड रुपैयाँ निकासा पाइएको अभियोगपत्रमै किटानीसाथ लेखिएको थियो।
गोर्खा मिडिया नेटवर्क प्रालिको सञ्चालकमध्येमा रवि लामिछानेको पनि नाम मिसिलमा खुलाइएको हो। यसरी रकम अपचलन गर्ने कम्पनीमा रवि लामिछानेको एक लाख ८० हजार कित्ता सेयर रहेको देखिएको छ। यो सेयरको मूल्य एक करोड ८० लाख रुपैयाँ कायम गरिएको छ। २०७८ पुस ७ गते गोर्खा मिडिया नेटवर्क प्रालिको सेयर उनको नाममा कायम भएको थियो।
यस्तै रवि लामिछानेरगोर्खा मिडिया नेटवर्क प्रालि खाता नम्बर ००१–००१–१०५–००००२२४ मा २ करोड रुपैयाँ निकासा भएको देखिएको छ।
