दिनेश रैदास, दाङ ।
राष्ट्रिय जनमोर्चा दाङले आगामी चैत २४–३० गतेसम्म सञ्चालन हुने सङ्घीयताविरोधी काठमाडौँकेन्द्रित आन्दोलनका लागि घनीभूत तयारी सुरु गरेको छ ।
केन्द्रीय सदस्यसमेत रहनुभएका राजमो दाङका अध्यक्ष गणेश आचार्यले २०८१ कात्तिक २४ गते शनिबार प्रेसवक्तव्य जारी गर्दै सो जानकारी दिनुभएको हो ।
वक्तव्यमा मङ्सिर, पुस र माघ महिनाभरि उक्त आन्दोलन सफल बनाउन विशेष सङ्गठनात्मक अभियान सञ्चालन गरिने बताइएको छ । त्यसका लागि जिल्लालाई तीन भागमा विभाजन गरिएको छ ।
त्यस क्रममा घोराही र तुलसीपुरको एउटा टोली बनेको छ । त्यसको संयोजक गणेश आचार्य रहने गरी शुक्रराज भण्डारी, भरत भण्डारी, कमला जिसी, रामबहादुर जिएम, ऋषिराम पौडेल, हरि खरेल, दुर्गाबहादुर केसी र चन्द्रबहादुर राउत सम्मिलित मूल टिम बनाइएको छ ।
त्यस्तै, राप्ती र लमहीको अर्को टिम बनेको छ । त्यसको संयोजक काशिनाथ पोख्रेल रहने गरी महेश रिजाल, केशवराज खनाल र रमेशमान गुरुङ सम्मिलित मूल टिम बनेको छ ।
एवम् प्रकारले गढवा गाउँपालिकाको बेग्लै टिम बनेको छ । प्रेमनारायण आचार्य संयोजक रहने गरी बसन्तराज पौडेल, कपिलदेव खनाल, चित्र एमसी र गुणनिधि शर्मा सम्मिलित मूल टिम बनेको छ ।
सम्बन्धित पालिकाभित्र रहनुहुने सबै राजमो तथा अन्य भाइचारा सङ्गठनका प्रतिनिधि तत् तत् समितिमा रहने वक्तव्यमा उल्लेख छ ।
वक्तव्यमा उक्त कार्ययोजनालाई प्रभावकारी बनाउन कात्तिक २४ गते राप्ती गाउँपालिकामा, कात्तिक ३० गते घोराही उपमहानगरपालिकामा, मङ्सिर १ गते लमही नगरपालिकामा, मङ्सिर ७ गते तुलसीपुर उपमहानगरपालिका र मङ्सिर ८ गते गढवा गाउँपालिकामा कार्यकर्ता भेला गरिने उल्लेख छ ।
