काठमाडौं । अमेरिकाका नवनिर्वाचित राष्ट्रपति डोनल्ड ट्रम्पले आफ्नो दोस्रो कार्यकाल अमेरिकाका लागि सुनौलो युग भएको दाबी गरेका छन् ।
जितको नजिक पुगेका डोनाल्ड ट्रम्पले फ्लोरिडाको पाम बिचमा भेला भएका समर्थकलाई सम्बोधन गरेका छन्। यद्यपि, उनको जितको घोषणा भइसकेको छैन ।
आफूले निकै ठूलो राजनीतिक जित प्राप्त गरेको बताउँदै ट्रम्पले अबको युग अमेरिकाको सुनौलो युग हुने दाबी पनि गरे।
परिवारका सदस्य र उपराष्ट्रपतिका उम्मेदवार जेडी भान्ससहित मञ्चमा आएका उनले आफूलाई चुनेकोमा मतदातालाई धन्यवाद दिए।
‘तपाईंहरुको ४७ औँ र ४५ औँ राष्ट्रपति चुनिने असाधारण मौका दिनुभएकोमा म अमेरिकी जनतालाई धन्यवाद दिन्छु,’ उनले भने, ‘हामी हाम्रो देशलाई निको पार्न सघाउने छौँ।’
उनले पत्नी मेलानिया र छोराछोरीलाई पनि धन्यवाद दिएका थिए ।
जितको नजिक पुगेका ट्रम्पलाई विश्वभरका नेताहरूले बधाई दिन थालेका छन्।
हंगेरीका प्रधानमन्त्ती भिक्टर अर्बानदेखि भारतका प्रधानमन्त्री नरेन्द्र मोदीसम्मले उनलाई बधाई दिएका छन्।
फ्रान्सेली राष्ट्रपति इम्यानुएल म्याक्रोँ, बेलायती प्रधानमन्त्री किअर स्टार्मर, इजरायली प्रधानमन्त्री बेन्यामिन नेतन्याहु, युक्रेनी राष्ट्रपति भ्लादिमिर जेलेनस्कीले लगायतले पनि बधाई दिएका छन्।
जारी मतगणनामा २६७ इलेक्टोरल मत जितिसकेका ट्रम्पले लोकप्रिय मतमा पनि फराकिलो अग्रता कायम गरेका छन्।
