काठमाडौं । राष्ट्रिय जनमोर्चाका पूर्व महासचिव एवं पूर्व सांसद हरि आचार्यले लिपुलेक, कालापानी सहित भारतले मिचेको भूमि फिर्ता लिन अन्तर्राष्ट्रिय अदालत जानुपर्ने बताउनुभएको छ ।
बुधबार बाँकेको कोहलपुरमा राजमो बाँकेले आयोजना गरेको विरोध सभालाई सम्बोधन गर्दै राजमो नेता आचार्यले भारतसँग वार्ता र समस्यालाई अन्तर्राष्ट्रियकरण दुवै सँगसँगै गर्न सरकारलाई सुझाव दिनुभयो ।
‘भारतीय साम्राज्यवादको दादागिरीबाट डराएर भारतको दलाली गर्ने होइन, सरकारले आफ्नो भूमि फिर्ता लिन सबै सम्भव उपाय अपनाओस्’ आचार्यले भन्नुभयो, ‘त्यसका लागि भारतसँग तत्काल वार्ताको थालनी गर र अन्तरास्ट्रिय अदालत जाऊ ।’
आचार्यले दुई तिहाईको बलियो सरकार भएको अवस्थामा र जनताले यति धेरै साथ समर्थन दिएको बेला खुट्टा नकपाइकन अघि बढ्न सरकारलाई सुझावसमेत दिनुभयो ।
कार्यक्रममा अखिल नेपाल किसान महासंघका महासचिव तुलसिराम साप्कोटा, राजमो बाँकेका अध्यक्ष भिमप्रसाद देवकोटा लगायतका नेताहरुले सम्बोधन गर्नुभएको थियो भने सञ्चालन अखिल नेपाल युवक संघ बाँकेका अध्यक्ष भरत खड्काले गर्नुभएको राजमो नेता जगदिश ढकालले जानकारी दिनुभयो ।
नवलपरासीमा विरोधसभा
यता, नवलपरासीको सुनवल चोकमा पनि राष्ट्रिय जनमोर्चाले विरोध सभाको आयोजना गरेको छ । विरोध सभालाई राष्ट्रिय जनमोर्चाका नेता कृष्ण पौडेल, राजमो नवलपरासीका अध्यक्ष कृष्णबहादुर आधिकारी , नेकपा (मसाल) का जिल्ला प्रवक्ता धनपति सापकोटा लगायत नेतहरुले सम्बोधन गर्नुभएको थियो ।
कार्यक्रमको सञ्चालन राजमो जिल्ला सलाहकार तिलक सुबेदीले गर्नुभएको थियो । वक्ताहरुले रास्ट्रियताको रक्षा र सिीमा आतिक्रमणविरुद्ध खबरदारी गर्दै सरकारलाई घुँडा नटेक्न चेतावनी दिनुभएको थियो ।
