अशोक खनाल, भालुवाङ ।
लुम्बिनी प्रदेशका वन तथा वातावरण मन्त्रालयका सचिव मोहनराज काफ्लेले प्रकृतिका कुचिकारको रूपमा परिचित लोपोन्मुख पन्छी गिद्धको संरक्षण सरकारको एकल प्रयासले मात्रै असम्भव नहुने बताउनुभएको छ ।
पोखरा पन्छी समाजको आयोजना र रुफोड फाउन्डेसन बेलायतको आर्थिक सहयोगमा २०८१ कात्तिक १२ गते सोमबार दाङको भालुबाङमा आयोजित कार्यक्रमलाई सम्बोधन गर्दै उहाँले यस्तो बताउनुभएको हो ।
उहाँले गिद्धलगायत सबै प्रकारका पन्छी संरक्षणका लागि सरकार, साझेदारी संस्था तथा सिङ्गो समाज सचेत भई जुटनुपर्ने आवश्यकता औल्याउनुभयो ।
कार्यक्रमको विभिन्न सेसनमा आफ्नो प्रस्तुति प्रस्तुत गर्दै पन्छी समाज पोखराका सचिव डा. हेमन्त डकाल, समाजकै संरक्षण अधिकृत देउबहादुर राना, आँखीझ्याल पोखराका टेक्निसियन पारस देवकोटाले गिद्ध संरक्षणसम्बन्धी अध्ययन, अनुसन्धान तथा कार्यक्रमको बारेमा विस्तृत जानकारी गराउनुभएको थियो ।
समाजका अध्यक्ष बसन्त घिमिरेको अध्यक्षता र गिद्धविज्ञ कृष्णप्रसाद भुसालको सञ्चालनमा भएको कार्यक्रममा जिल्ला वन कार्यालय अर्घाखाँचीका प्रमुख केशव खड्का, डिभिजन वन कार्यलय लमहीका एमप्रसाद गैरे, डिभिजन वन कार्यलय बाँकेका प्रमुख नवराज भण्डारी, गौतमबुद्ध अन्तर्राष्ट्रिय विमानस्थल भैरहवाका गिद्ध संरक्षणविद कृष्णप्रसाद शर्मा, राजपुर गाउँपालिकाका डा. दीपक नेपाली, भौतिक पूर्वाधार विकास कार्यालय देउखुरीका वरिष्ठ इन्जिनियर बसन्तकुमार चन्द, प्रदेश राजधानी निर्माण आयोजना कार्यालय इन्जिनियर निश्चल सापकोटा, प्रदेश पूर्वाधार विकास मन्त्रालयका गोरखनाथ योगी, गढवा गाउँपालिकाका खेमबहादुर चौधरी, राप्ती गाउँपालिकाका वन तथा वातावरण शाखाका शशि सुवेदी, राजेन्द्रबहादुर सोनारीमगर र विपिन भुसाल, गिद्ध संरक्षण केन्द्र लालमटियाका अध्यक्ष एमबहादुर रोकालगायतको सहभागिता रहेको थियो ।
होटल पौवा परिसर पाखापानीमा भएको उक्त कार्यक्रममा देशव्यापी गिद्ध संरक्षणबारे छलफल गरिएको थियो ।
