काठमाडौं । झापाको केर्खामा जन्मदिन मनाउन केक लिएर बजारबाट घर फर्कँदै गरेकी बालिका र उनका हजुरबाको बसको ठक्करबाट ज्यान गएको छ ।
कमल गाउँपालिका ३ सानो केर्खा घर भएका टेकबाहदुर लिम्बु र उनकी नातिनी कृपा लिम्बुको ज्यान गएको हो। लालिमा बोर्डिङ स्कुलमा कक्षा ४ मा पढ्ने कृपाको जन्म दिन मनाउनका लागि चोकमा केक र मासु किनेर साइकलमा उनीहरू घर फर्किँदै गर्दा रात्रि बसले ठक्कर दिएको थियो।
काँकडभिट्टाबाट काठमाडौँतर्फ आउँदै गरेको बसको ठक्करबाट हजुरबा र नातिनीको ज्यान गएको स्थानीयले बताएका छन् ।
घटनापछि केर्खा तनावपूर्ण बनेको छ । घटनास्थलमै ज्यान गुमाएका दुवै जनाको शव प्रहरीले भ्यानमा उठाएपछि अवस्था तनावपूर्ण बनेको स्थानीयको भनाई छ ।
प्रहरीले उठाउँदै गर्दै स्थानीयले शव भ्यानबाट झारेर सडकमै राखेका छन्। अहिले साइकल र दुवै शव सडकमै छ।
आक्रोसित स्थानीयले नजिकै रहेका प्रहरी बिटमा आगजनि गरेका छन्। चौकीभित्र रहेको बसमा तोडफोड गरेका छन् ।
बसमा आगजनि गर्न स्थानीय चौकीभित्रै प्रवेश गर्न खोज्दा प्रहरीले अश्रुग्यास प्रहार गरेको छ । बुधबार साँझ अबेरसम्म पनि त्यहाँ तनावपूर्ण अवस्था रहेको स्थानीयले बताएका छन् ।
