वासिङटन । इजरायलले ह्वाइट हाउसलाई इरानमा नियोजित जवाजी आक्रमणका क्रममा त्यहाँको आणविक वा तेल केन्द्रप्रति लक्षित नगर्ने आश्वासन दिएको अमेरिकी सञ्चारमाध्यमले सोमबार जनाएको छ ।
गत अक्टोबर १ मा इरानले इजयायलमा गरेको क्षेप्यास्त्र आक्रमणको प्रतिक्रियामा इजरायलले प्रतिआक्रमण गर्ने वाचा गरेको थियो ।
इजरायली प्रधानमन्त्री बेन्जामिन नेतान्याहूले ह्वाइट हाउसलाई इजरायली प्रतिआक्रमणले सैन्य साइटलाई मात्र लक्षित गर्ने आश्वासन दिनुभएको एक अज्ञात अमेरिकी अधिकारीलाई उद्धृत गर्दै वासिङटन पोस्टले जनाएको छ ।
गत हप्ता अमेरिकी राष्ट्रपति जो बाइडेन र नेतान्याहूबिच भएको फोनवार्ता साथै अमेरिकी रक्षासचिव लोयड अस्टिन र उहाँका इजरायली समकक्षी योव ग्यालान्ट बिचको कुराकानीमा यो प्रतिज्ञा भएको एक अमेरिकी अधिकारीलाई उद्धृत गर्दै वालस्ट्रिट जर्नलले जनाएको थियो ।
क्षेत्रीय युद्धको थप विस्तारबाट बच्न र विश्वव्यापी ऊर्जाको मूल्यवृद्धिको चिन्ताको बिचमा राष्ट्रपति बाइडेनले इजरायललाई इरानको आणविक वा तेल केन्द्रमा आक्रमण नगर्न चेतावनी दिइएको बताइएको थियो । (रासस/एएफपी)
