गाजापट्टी (प्यालेस्टिनी अधीनस्थ क्षेत्र) । इजरायलले एउटा विद्यालय आश्रयस्थमा बिहीबार गरेको आक्रमणमा कम्तीमा सात जनाको मृत्यु भएको गाजाका नागरिक सुरक्षा उद्धारकर्ताले बताएका छन् यद्यपि इजरायली सेनाले हमास कमान्ड केन्द्रलाई लक्षित गरेको बताएको छ ।
अक्टोबर ७ मा हमासले इजरायलमाथि गरेको आक्रमणबाट युद्ध सुरु भएपछि घेराबन्दीमा परेको गाजापट्टीका २४ लाख जनसङ्ख्याको ठुलो हिस्सा कम्तीमा एकपटक विस्थापित भएको छ र तीमध्ये धेरैले विद्यालय भवनमा आश्रय लिएका छन् ।
‘उत्तरी गाजाको जबालिया शिविरमा रहेको अलफलुजा विद्यालयलाई लक्षित गरी भएको इजरायली मिसाइल आक्रमणमा बालबालिकासहित सात जना सहिद भए भने धेरै घाइते भएका छन्’ नागरिक सुरक्षा निकायका प्रवक्ता महमुद बस्सलले भने ।
इजरायली सेनाले अलफलुजा विद्यालयमा रहेको कमान्ड एन्ड कन्ट्रोल केन्द्रभित्र सक्रिय हमास लडाकुलाई लक्षित गरी सटिक आक्रमण गरेको बतायो । सैन्य विज्ञप्तिमा हताहतीका बारेमा कुनै जानकारी दिइएको थिएन ।
बिहीबार भएको आक्रमण गाजामा करिब एक वर्षदेखि जारी युद्धमा विस्थापितलाई आश्रय दिइरहेका विद्यालय भवनमा भएका इजरायली आक्रमणको शृङखामा यो पछिल्लो थियो ।
प्यालेस्टिनी शरणार्थीका लागि राष्ट्रसङ्घीय निकाय युएनआरडब्लुएले सेप्टेम्बर ११ मा मध्य गाजाको संयुक्त राष्ट्र सङ्घद्वारा सञ्चालित अलजौनी विद्यालयमा भएको इजरायली आक्रमणमा मारिएका १८ मध्ये आफ्ना छ कर्मचारी रहेको बताएपछि अन्तर्राष्ट्रिय आक्रोश बढेको थियो ।
इजरायली सेनाले हमासमाथि हजारौँ गाजावासीले आश्रय लिइरहेका विद्यालय भवनमा लुकेको आरोप लगाउँदै आएको छ भने ती आरोपलाई हमासले अस्वीकार गरेको छ । (रासस/एएफपी)
