विष्णु शर्मा ##

रम र झम चाडबाड आए
गाउँ र सहर
परदेशमा पसिना बगाउनुपर्नै
मारेर रहर

अग्रजको हातको लगाउन मन थियो
टीका र जमरा
गाउँ र सहर पुग्न मन थियो
बनेर भमरा

दिदीको हातको सतरङ्गी टीका
बच्चामै लाएको
भर्खर झैँ लाग्छ घुमाउनी रोटी
झिलिङ्गा खाएको

घर फर्की जाऊँ दिँदैनन छुट्टी
साहुमहाजनले
उडेर जाऊँ कि गुडेर जाऊँ
भन्छ यो मनले

वृद्ध ती बाबा र आमा
दोबाटो हेर्दै छन्
सहारा दिने छैन कोही
बिमारले घेर्दै छन्

साना साना लाला र बाला
बाबालाई खोज्दै छन्
कहिले आउनुहुन्छ मेरो बाबा भनी
आमालाई सोध्दै छन्

भक्कानो छुट्छ आमाको मनमा
प्रश्न सुनेर
सान्त्वना दिन्छिन् बच्चालाई कठै
आउनुहुन्छ भनेर

सरकारले कहिल्यै ल्याएको छैन
रोजगारका योजना
कौडीको दाममा बेचिएका छन्
देशका खजाना

विदेशी गल्लीमा भौतारिनुपर्छ
देशका कर्णधार
उर्वरा शक्ति विदेशलाई
भा’को छ उपहार

पहुँचवालाको सुदिन ल्याउने
सरकार बन्दछन्
जनताका दिन ल्याउन लागेको
मुखले भन्दछन्

आएन सरकार जनता र देशलाई
केन्द्रमा राख्ने
कहिले हो हाम्ले स्वदेश फर्की
चाडबाडको स्वाद चाख्ने