दाङ । अखिल नेपाल राष्ट्रिय स्वतन्त्र विद्यार्थी युनियन (छैठौं) को राष्ट्रिय सम्मेलनको तयारी अन्तिम चरणमा पुगेको छ ।
यही असोज १० देखि १२ गतेसम्म हुने २३ औँ राष्ट्रिय सम्मेलनको तयारी लगभग पूरा भएको अध्यक्ष देवेन्द्र कुँवरले जानकारी दिनुभयो ।
सम्मेलन दाङको घोराही नगरपालिका–१० स्थित फनपार्कमा हुनेछ ।
कार्यक्रममा विभिन्न विद्यार्थी संगठन र नेकपा (मसाल) का जनवर्गीय संगठनहरूलाई आमन्त्रण गरिएको अध्यक्ष कुँवरले बताउनुभयो ।
‘संघीयता, राष्ट्रघात र भ्रष्टाचार अन्त्यका लागि हाम्रो आन्दोलन, वैज्ञानिक र रोजगारमुलक शिक्षा प्राप्तिका लागि २३ औँ राष्ट्रिय सम्मेलन’ भन्ने नाराका साथ हुन लागेको राष्ट्रिय सम्मेलनको उद्घाटन राष्ट्रिय जनमोर्चाका अध्यक्ष चित्रबहादुर केसीले गर्नुहुनेछ ।
सम्मेलन अन्तर्गत असोज १० गते उद्घाट भएपछि ११ र १२ बन्दसत्रका कार्यक्रम हुनेछन् । बन्दसत्रमा विधान संशोधन, राजनीतिक, सांगठनिक तथा आर्थिक प्रतिवेदन पेश हुनेछ । त्यस्तै, विशेष प्रस्ताव र आगामी कार्यक्रमबारे छलफल गर्ने युनियनले जनाएको छ ।
सम्मेलनले नयाँ नेतृत्वसमेत चयन गर्नेछ ।
