काठमाडौं । राष्ट्रिय जनमोर्चाका अध्यक्ष चित्रबहादुर केसीले भारतले नेपाली भूभाग लिपुलेकमा निर्माण गरेको सडकबारे तत्काल नेपालको धारणा स्पष्ट पार्न सरकारसँग माग गर्नुभएको छ ।
शनिबार एक वक्तव्य प्रकाशित गरी केसीले भारतीय साम्राज्यवादको हेपाहा प्रवृत्तिको विरोध नगरेर सरकार भारतपरस्त बनेको आरोप पनि लगाउनुभएको छ ।
यस्तै, सरकारले मिलेनियम च्यालेन्ज कोअपरेसन (एमसीसी) संसदबाट पारित गर्न गरिएको प्रयासको पनि बिरोध गर्नुभएको छ । एमसीसी पारित गराउन अमेरिकी साम्राज्यवादले दिएको दबाबप्रति पनि केसीले तिब्र बिरोध जनाउनुभएको छ ।
बक्तव्यमा भनिएको छः ‘नेपाली भूमि लिपुलेक हुँदै मानसरोबर जाने सडकको भारतले उद्घाटन गरेको छ । राष्ट्रिय जनमोर्चाले त्यसको तीव्र शब्दमा विरोध र भ्रत्र्सना गर्दछ । भारतीय साम्राज्यवादी नीतिप्रति हाम्रो पार्टीले लगातार रूपमा विरोध गर्दै आएको छ । तर भारतीय साम्राज्यवादको त्यसप्रकारको नीतिप्रति नेपाल सरकारले कुनै विरोध प्रकट गरेको छैन । सरकारको त्यो नीति भारतपरस्त छ र हाम्रो पार्टीले त्यो नीतिलाई कडा शब्दमा विरोध गर्दै तत्काल त्यो विषयमा आफ्नो स्थिति स्पष्ट गर्नका लागि सरकारसँग माग गर्दछ ।
एमसीसी इण्डोप्यासिफिक रणनीतिको अङ्ग हो भन्ने कुरा स्पष्ट भइसकेको छ । त्यो सम्झौताको नेपालमा व्यापक रूपले विरोध गर्दै आन्दोलन हुँदै आएको छ । हाम्रो पार्टीले त्यो इण्डोप्यासिफिक रणनीतिको अङ्ग भएकोले त्यसलाई सम्पूर्ण रूपले अस्वीकार गर्नुपर्दछ भन्ने मत राख्नुको साथै संयुक्त आन्दोलन सञ्चालन गर्दै आएको छ । त्यो सम्झौताबारे नेकपा (नेकपा) को कार्यदलले पनि यथावत रूपमा त्यसलाई स्वीकार गर्न नसकिने भनी प्रतिवेदन दिएको थियो । यसको अर्थ त्यो स्वीकार गर्न नसकिने सम्झौता हो भन्ने कुरा स्पष्ट छ ।
यद्यपि नेकपाको कार्यदलले संशोधन गरेर त्यसलाई स्वीकार गर्न सकिने भन्ने मत प्रकट गरेको छ, त्यसलाई हाम्रो पार्टीले गलत मान्दछ । नेकपाको कार्यदलले त्यसप्रकारको प्रतिवेदन दिएपछि अमेरिकाले एमसीसी सम्झौतालाई यथावत रूपमा नै स्वीकार गर्नुपर्छ भनी अभिव्यक्ति दिएको छ । त्यसरी अभिव्यक्ति दिनुको उद्देश्य एमसीसी सम्झौतालाई संसदद्वारा पारित गराउनका लागि नेपाललाई दबाव दिनु हो । त्यो अमेरिकी साम्राज्यवादको नेपालमाथिको खुला हस्तक्षेप हो र हाम्रो पार्टीले त्यसको कडा विरोध गर्दछ ।
’यो पनि पढ्नुहोस्ः भारतद्वारा लिपुलेक अतिक्रमण गरेर बनाएको सडक सञ्चालनमा
