समीर सिंह##

तिजको दिन मात्रै होइन सधैँभरि रमाउने
कस्तो भयो तिज हेर बाटो बिराउने

महिला सङ्घको झन्डा बोकी तिज गीत गाएको
नौलो समाज बनाऔँ भनी सन्देश दिएको

अब विभेद नसहने भन्दै गीत गाएको
समानताको बाटो खोज्दै अघि बढेको

पार्टी प्यालेस होइन अब भोको पेट हेर न
भद्दा शैली तोड्दै अब बाटो खोज न

साउदी दुवै कतार पुगी उनले पैसा पठाउने
मूल्य तिम्ले नबुझेर नाच्दै उडाउने

उनको उमेर बढ्छ भनी तिमी ब्रत बसेको
रक्सी खाए उसले हेर कुट्दै हिँडेको

संस्कृति र परम्परा सबै उनले बना’को
आफूलाई ठुलो बनाई हाम्लाई नचा’को

हक माग्न उठौँ भन्दा तिम्लाई फुर्सद नहुने
बानी तिम्लाई परिसक्यो दमन सहने

उनलाई मात्र ठुलो मान्ने रीति हाम्ले मान्दैनौँ
अधिकारको गीत गाउन हामी छाड्दैनौँ

गहना र रातो साडी किन हाम्लाई चाहियो
विचार हाम्रो त्यसै राम्रो न्याय चाहियो

वर्षौंदेखि सहँदै आयौँ स्वाभिमान बिर्सियौँ
साँचो कुरा बुझिसक्यौँ अब सहन्नौँ

संस्कृति र रीतिरिवाज हामी आफै बनाउँछौँ
कस्तो हुन्छ समाज हेर हामी देखाउँछौँ

पुँजीवादी सरकारले वस्तु हाम्लाई बना’का
आफ्नो समान बेच्नलाई प्रयोग गरेका

पाप तिम्ले गर्‍यौँ भन्दै पञ्चमीको ब्रत रे !
प्रकृतिको निर्माण गर्ने हामी दोषी रे !

सामन्तवादले बनाएको तिज हामी मान्दैनौँ
महिलालाई ठेस पुग्ने गीत गाउँदैनौँ

रूढिवादी तिज होइन नयाँ गीत गाउने हो
समानताको बाटो खोज्दै अघि बढ्ने हो

बाटो नयाँ खोज्छौँ भनी हामी यहाँ आएका
नारीवादी होइनौँ हामी वर्ग खोजेका