काठमाडौं । सहकारी थगी प्रकरणमा राष्ट्रिय स्वतन्त्र पार्टीका सहमहान्त्री विपिन आचार्यले पार्टीका सभापछि रवि लामिछानेको जस्तै बयान दिएका छन् ।
सहकारी संस्था बचत रकम दुरुपयोग सम्बन्धमा संसदीय छानबिन विशेष समितिले हिजो ९आइतबार० रास्वपा सहमहामन्त्री आचार्यसँग बयान लिएको थियो ।
सूर्यदर्शन सहकारीको रकम गोर्खा मिडियामा जाँदा आचार्यको तर्फबाट गएकोबारे समितिले उनीसँग सोधपुछ गरेको थियो।
बयानका क्रममा आचार्यले आफ्नो खातामा रकम आएकोबारे आफू अनविज्ञ रहेको जानकारी समितिलाई गराएका छन्।
‘१२/१३ करोड कहाँबाट आयो भन्ने मलाई थाहा छैन। खातामा त आयो कहाँबाट आयो थाहा छैन,’ उनले बयानका क्रममा भनेका छन्।
आचार्यले गोर्खा मिडियामा क्रिएटिभ डाइरेक्टरको रुपमा काम गरेका थिए।
लामिछानेसँग ७ गते बयान
संसदीय छानबिन विशेष समितिले रास्वपाका सभापति एवम् पूर्व गृह तथा उपप्रधानमन्त्री रवि लामिछानेसँग यही भदौ ७ गते बयान लिने भएको छ।
पोखराको सूर्यदर्शन सहकारी, बुटवलको सुप्रिम सहकारी र चितवनको सहारा सहकारीबाट गोर्खा मिडियामार्फत रकम अपचलन गरेको आरोप लामिछानेमाथि छ। यी लगायत देशभरका समस्याग्रस्त झण्डै १ सय सहकारीका सञ्चालक र सेयर सदस्यहरूसँग समितिले बयान लिइरहेको छ।
समितिका एक सदस्यका अनुसार, आगामी भदौ ७ गते लामिछानेसहित गोरखा मिडियामै आवद्ध छविलाल जोशी बञ्जाडेसँग बयान लिने तयारी छ।
बञ्जाडे ग्यालेक्सी टेलिभिजनका सञ्चालक गितेन्द्रबाबु राई ९जीबी० का व्यापारिक साझेदार हुन्। उनले टेलिभिजन स्थापना हुँदादेखि नै राईसँग जोडिएर काम गरेका थिए।
समितिका ती सदस्यले दिएको जानकारी अनुसार, सभापति लामिछाने लगायतले विभिन्न सहकारीबाट रकम ल्याएर अपचलन गरिएको देखिएको छ।
समितिले सहकारी संस्था बचत रकम दुरुपयोग सम्बन्धमा विभिन्न व्यक्तिलाई बोलाएर बयान तथा छलफल गर्दै आएको छ।
सहकारी मुद्दामा जेलमा रहेका सञ्चालक, सेयर सदस्य र अन्य सदस्यहरूसँग समितिले बयान लिइसकेको छ।
समितिका सभापति सूर्य थापाका अनुसार, बयान लिने क्रम अन्तिम चरणमा पुगेको र अब प्रतिवेदन लेखनमा केन्द्रित हुनेछ।
