शङ्करप्रसाद पोख्रेल, बुटवल ।
रक्तिम सांस्कृतिक अभियान केन्द्रीय समितिको आयोजनामा सैद्धान्तिक तथा राजनीतिक प्रशिक्षण उद्घाटन भएको छ ।
राष्ट्रिय जनमोर्चाका अध्यक्ष तथा सांसद चित्रबहादुर केसीले २०८१ भदौ १ गते शनिबार प्रदेश कार्यालय भवन चाँदमारीमा आयोजित एक कार्यक्रममाझ मैनबत्ती बालेर सम्मेलनको उद्घाटन गर्नुभएको हो ।
सो अवसरमा मन्तव्य राख्दै उहाँले रक्तिमका कलाकारहरू भनेका नाच्ने, गाउने मात्र नभएर सैद्धान्तिक र राजनीतिमा लेस हुनुपर्नेमा बताउनुभयो ।
केसीले रक्तिमले देशको आमूल परिवर्तनका लागि महत्त्वपूर्ण भूमिका खेलेको बताउँदै रक्तिम र जनताको सम्बन्ध नङमासु जस्तै भएकाले रक्तिम अब गाउँगाउँमा सैद्धान्तिक राजनीतिक विचारका सथमा जनवादी गीतसङ्गीतसहित जनतासामु जानुपर्ने बताउनुभयो ।
उद्घाटन शत्रमा राजमो महासचिव मनोज भट्टले रक्तिम सांस्कृतिक अभियान जनताको मनमनमा रहेको प्यारो सङ्गठन भएकाले अब रक्तिमका कलाकार नाच्नेगाउनेमा मात्र सीमित नभएर सैद्धान्तिक र राजनीतिक रूपमा लेस हुनुपर्ने बेला आएको बताउनुभयो ।
राजमो लुम्बिनी प्रदेश सल्लाहकार सुरेश थापाले कलाकारको भूमिका देशको जनवादी आन्दोलनमा अगाडि रहने गरेको बताउँदै वैचारिक रूपमा कलाकारहरू परिपक्व हुनुपर्नेमा जोड दिनुभयो।
कार्यक्रमको अध्यक्षता रक्तिमका केन्द्रीय अध्यक्ष गिरीप्रसाद बुढाले गर्नुभएको थियो भने स्वागत भाषण उपाध्यक्ष बाबुराम आचार्य र सञ्चालन महासचिव हेमराज आश्रमले गर्नुभएको थियो ।
कार्यक्रमा रक्तिम कलाकारले रक्तिम गीत र नृत्यद्वारा स्वागत गरेका थिए ।
सो सैद्धान्तिक तथा राजनीतिक प्रशिक्षण कार्यक्रम भदौ ३ गतेसम्म चल्ने महासचिव हेमराज आश्रमले बताउनुभयो ।
