काठमाडौं । भक्तपुरको गट्ठाघरमा भएको दुर्घटनामा ज्यान गएको भनिएकी युवती जीवितै रहेको पाइएको छ ।
यसअघि दोलखाको मेलुङ गाउँपालिका ४ का शम्भु नेपालीले प्रहरी कार्यालयमा पुगेर आफ्नी बहिनी भएको जानकारी दिएपछि प्रहरीले त्यही विवरण सार्वजनिक गरेको थियो । तर उनले गलत जानकारी दिएको खुलेको छ।
आफ्नो मृत्यु भएको समाचार थाहा पाएपछि ती युवती प्रहरीको सम्पर्कमा आएकी थिइन् ।
मेलुङ ४ का वडाध्यक्ष सोमबहादुर बम्जनले मृत्यु भएकी भनिएकी युवती हाल चितवनमा रहेको जानकारी दिए ।
दुर्घटनामा परेको स्कुटरको सवारी दर्ता किताब (ब्ल्युबुक) ओखलढुंगाका उत्तम कोइरालाको नाममा रहेको पाइएको छ। यस्तै दुर्घटनास्थलमा रमेश न्यौपानेको नाममा ट्राफिकले काटेको चिट पनि फेला परेको छ।
भक्तपुरका एसपी वेद विष्टले दुर्घटना भएको स्कुटरको सीसीटीभी फुटेज र सवारी धनीको खोजी गरिहेको बताए।
उनका अनुसार निजी व्यक्तिको घरको सीसीटीभी फुटेजमा एकजना स्टकोट लगाएका पुरुषले स्कुटर चलाइरहेको देखिएको छ।
बिहीबार दिउँसो २ बजेतिर गट्ठाघरमा ना६ख २१७३ नम्बरको ट्रकले बा३९प ८९४४ नम्बरको स्कुटरलाई ठक्कर दिँदा स्कुटर चालकको घटनास्थलमै मृत्यु भएको छ।
मृतकको पहिचान फरक परेपछि पुनः सनाखत गर्ने प्रयास भइरहेको प्रहरीले जनाएको छ।
ट्रकले ट्राफिक चेकिङमा रोकिराखेको स्कुटरलाई करिब एक सय मिटर परसम्म घिसारेको थियो। मृतकको शरीर क्षतविक्षत अवस्थामा छ।
ट्राफिक प्रहरीका कारण दुर्घटना भएको भन्दै त्यहाँ जम्मा भएका स्थानीयले ट्राफिकविरुद्ध नाराबाजी गर्दै प्रदर्शनमा उत्रिएका थिए।
आक्रोशित स्थानीयले ठक्कर दिने ट्रकमा आगो लगाउने प्रयास गर्नुका साथै केही सवारी साधनमा तोडफोड गरे। दुर्घटनापछि गठ्ठाघरको अवस्था दिनभरजसो तनावपूर्ण बन्यो। स्थितिलाई नियन्त्रणमा लिने क्रममा प्रहरीले ८ सेल अश्रुग्यास प्रहार गरेको थियो। केही स्थानीय र प्रहरी घाइते भएका छन्।
ट्रकका चालक बानेश्वर बृत्तमा उपस्थित
यसैबीच गठ्ठाघरमा दुर्घटना भएको ट्रकका चालक प्रहरीको सम्पर्कमा आएका छन्।
सर्लाहीको मलंगवा नगरपालिका २ घर भएका ३२ वर्षीय सतेन्द्र श्रेष्ठ बिहीबार साँझ ७ बजेतिर काठमाडौंको बानेश्वर बृत्तमा आफै उपस्थित भएका हुन्।
ट्रक सशस्त्र प्रहरी गण नम्बर–२ महराजगञ्ज लगिएको छ।
