काठमाडौं । मोहन वैद्य किरणले नेतृत्व गरेको क्रान्तिकारी कम्युनिष्ट पार्टी फेरि फुटेको छ। तीनजना सचिवालय सदस्यसहित ८ नेताले पार्टीबाट विद्रोह गरेको घोषणा गरेका छन् ।
सचिवालय सदस्य हरिकृष्ण गजुरेल, भुपेन्द्र न्यौपाने र वसन्त बोगटीसहित आठ केन्द्रीय सदस्यले संयुक्त विज्ञप्ति प्रकाशित गरी विद्रोह गरेको बताएका हुन् ।
सोमबार (२०८१ साउन २८ गते) विज्ञप्ति प्रकाशित गरी नेताहरूले मोहन वैधको शास्त्रीय चिन्तन र जडताबाट राष्ट्रिय मुक्तिको क्रान्ति सम्भव नभएको बताएका छन् ।
वैद्य नेतृत्वको क्रान्तिकारी कम्युनिष्ट पार्टीले भने ‘बैठकमा अनुपस्थित’ भएको आरोप लगाउँदै तीनैजना सचिवालय सदस्यलाई एक महिनाका लागि निलम्बन गरेको जनाएको छ ।
यसअघि साउन १ गते पार्टीका सहसंयोजक धर्मेन्द्र बास्तोला कञ्चनले पार्टी एकता भंग भएको घोषणा गरेका थिए । बास्तोलाले आफू नेतृत्वको नेकपा (बहुमत) ब्युँताएका हुन्।
गत वर्षको २०८० वैशाख १८ गते वैद्य नेतृत्वको नेकपा क्रान्तिकारी माओवादी र बास्तोल नेतृत्वको नेकपा बहुमतले पार्टी एकता गरेर क्रान्तिकारी कम्युनिष्ट पार्टी, नेपाल बनाएका थिए।
केही महिनाअघि मसालबाट गएको समूह मिसिएपछि वैद्य नेतृत्वको पार्टी तीनपटक फुटिसकेको छ ।
नेकपा क्रान्तिकारी माओवादीले आगामी कात्तिक २ गतेदेखि पार्टीको एकता महाधिवेशन गर्ने तयारी गरेको छ । महाधिवेशन तयारीका लागि बसेको केन्द्रीय समितिको बैठकमा गजुरेलसहित तीनजना सचिवालय सदस्यले समानान्तर दस्ताबेज प्रस्तुत गरेका थिए ।
यस्तै, धर्मेन्द्र बास्तोलाले अर्को दस्तावेज पेस गरेका थिए । बास्तोलाको समूह भने नेकपा बहुमत ब्युँताएर यसअघि नै अलग भइसकेको छ ।
पार्टीबाट विद्रोहको नेतृत्व गरेका नेता गजुरेलले आफूहरु समग्र पार्टीलाई रुपान्तरण गर्दै राष्ट्रिय मुक्ति क्रान्तिको नेतृत्व गर्ने दाबी गरे ।
गजुरेलले युगदर्शनसँग भने, ‘क. किरणको नीति र चिन्तनले नयाँ पुस्तालाई भरोसा जगाउन सकेन । उहाँको जडता, शास्त्रिय चिन्तन र सारसंग्रहवादविरुद्ध हाम्रो विद्रोह हो । अहिलेको आवस्यकता राष्ट्रिय मुक्ति क्रान्ति गर्नु हो । यसका लागि२ र३ महिनाभित्रै सशक्त संगठन निर्माण गर्नेगरी हामी अघि बढेका छौँ ।
