हेरौँ को कहाँ पुगिन्छ
को कहाँ रोकिन्छ
को कता ठोकिन्छ
कसले के के भोगिन्छ

कसले बाटो छोडिन्छ
को कता मोडिन्छ
कहाँ सम्बन्ध तोडिन्छ
कता नाता जोडिन्छ

कता चुलो फोरिन्छ
कता भान्सा जोडिन्छ
को पछि सरिन्छ
को अघि बढिन्छ

हामी दुईमा एक गलत छौँ
एउटै बाटो पक्डेका हौँ
ऐले अलग अलग छौँ
सही गलत छुट्टिने छ
केही समय धैर्य गरौँ

जब हामी थाक्ने छौँ
सजिलो बाटो ताक्ने छौँ
आफ्नै साथीसँग देखी
सात कोष पर भाग्ने छौँ

अलि दिन निक्कै
तडकभडक गर्ने छौँ
अरूको कुरा त परै छोडौँ
आफैसँग हार्ने छौँ

जित्न त निरन्तरता चाहिन्छ
आत्तिएर कहाँ हुन्छ र ?
लौ न मलाई छिट्टै चाहियो भनेर
राज्यसत्ता कसले दिन्छ र ?
त्यसैले को सही को गलत
केही समय हेरौँ
एकआपसमा तँछाडमछाड नगरौँ
अझै केही समय धैर्य गरौँ