कपिलवस्तु । अखिल नेपाल ट्रेड युनियन महासंघ (अन्टुक), कपिलवस्तुको अध्यक्षमा केरसिंह अदै चयन हुनुभएको छ । शनिबार भएको जिल्ला भेलाले अदैको अध्यक्षतामा समिति पुनर्गठन गरेको हो ।

१५ सदस्यीय जिल्ला समितिको उपाध्यक्षमा रामबहादुर बुढाथोकी, सचिव टोपबहादुर भाट क्षेत्री, सहसचिव यमकुमार महरा र कोषाध्यक्षमा नागराज योगी चयन हुनुभएको छ । सदस्यहरूमा हिमा विक, मनु बराल, रमेश भर, सीता विक, मनोज शर्मा रहनुभएको छ भने दुई स्थान रिक्त राखिएको छ ।

भेलाले रामबहादुर थापा र ज्ञानेश्वर पौडेललाई सल्लाहकार चयन गरेको छ ।

कपिलवस्तुको चन्द्रौटामा सम्पन्न भेलामा (अन्टुक) का केन्द्रीय सदस्य तथा राष्ट्रिय जनमोर्चाका जिल्ला सचिव समेत रहेका अदैले सम्बोधन गर्दै मजदुरहरूको हक हित, ट्रेड युनियन अधिकार तथा वर्तमान राजनीतिकअवस्था बारे प्रकाश पार्नुभएको थियो ।

कार्यक्रममा राष्ट्रिय जनमोर्चाका जिल्ला कोषाध्यक्ष केहरसिंह पुनमगर, जातीय समता समाजका जिल्ला अध्यक्ष दिलबहादुर विक र रक्तिम सांस्कृतिक अभियानका केन्द्रीय सदस्य मानबहादुर नेपालीले मन्तव्य राख्नु भएको थियो ।

भेलामा अखिल नेपाल महिला संघकी जिल्ला सहसचिव बिनिता अदै, रक्तिम सांस्कृतिक अभियानका जिल्ला अध्यक्ष बेगम बुढा, राजमो विजयनगरका अध्यक्ष गोविन्द परियारलगायत नेताहरूको आतिथ्यता रहेको थियो ।

भेला पछिको बैठकले जिम्मेवारी बाँडफाँड गर्नुको साथै पेसागत संगठनको भेला गर्ने निर्णय गरेको छ । जस अनुसार अखिल नेपाल होटल मजदुर युनियनको जिम्मा, यमकुमार महरा र टोपबहादुर विसीलाई, औद्योगिक मजदुर यूनियनमा रामबहादुर बुढाथोकी र केरसिंह अदै, निर्माण मजदुर युनियनको जिम्मा रमेश भर र हिमा विकलाई दिइएको छ ।

यस्तै, यातायात मजदुर युनियन र रिक्सा मजदुर युनियनको जिम्मा नागराज योगी र राम बहादुर बुढाथोकीलाई, व्यापार व्यवसायी समितिका लागि ज्योतिलाल भुसाल र मनु बराललाई जिम्मा दिइएको छ ।

भेलामा रक्तिम सांस्कृतिक अभियानका कलाकारहरूले स्वागत गीत तथा नृत्य प्रस्तुत गरेका थिए ।

नवनिर्वाचित समितिलाई श्यामप्रकाश खनालले बधाई तथा शुभकामना दिनु भएको थियो ।
ज्योतिलाल भुसालको अध्यक्षतामा सम्पन्न कार्यक्रमको सञ्चालन यमकुमार महराले गर्नु भएको थियो ।