काठमाडौँ । अख्तियार दुरुपयोग अनुसन्धान आयोगले भ्रष्टाचार आरोपीको पक्षमा विशेष अदालतमा बयान दिएपछि दुई जना सरकारी साक्षी विरुद्ध पनि मुद्दा दायर गरेको छ ।
पोखरा महानगरपालिकाका कर्मचारी सबइन्जिनियर उषा किरण रोकायासमेत भएको घुस/रिस्वत लिई भ्रष्टाचार गरेको मुद्दा (मुद्दा नं ०८०सीआर०१६७) मा सरकारी साक्षीको रूपमा पेस गरिएका चितवनको कालिका नगरपालिका–६ घर भई हाल पोखरा महानगरपालिका–१० बस्ने केशरीप्रसाद तिवारी र उर्मिला पौडेलले आयोगमा अनुसन्धान अधिकृतसमक्ष गरेको बयान कागजको प्रतिकूल हुने गरी बकपत्र गरेको अख्तियारको ठहर छ ।
आयोगले तिवारी र पौडेलले अख्तियारका अनुसार कास्की जिल्लाको पोखरा महानगरपालिका–१० मा निर्माण भएको घरको सम्पन्न प्रमाणपत्र प्राप्त गर्न शिवप्रसाद बराल, उषाकिरण रोकाया, सुरज कुँवरसमेतलाई तीन लाख ५० हजार रुपैयाँ घुस/रिस्वत रकम दिएको अनुसन्धानका क्रममा पुष्टि भएको जनाएको छ ।
सो मुद्दामा उनीहरूलाई प्रतिवादी नबनाई सजायमा पूर्ण छुट मागसहित सरकारी साक्षी बनाइएकोमा विशेष अदालतमा बकपत्र विपरीत बयान दिएको अख्तियारको आरोप छ ।
उक्त कार्य भ्रष्टाचार निवारण ऐन–२०५९ को दफा ३ को उपदफा (३) अन्तर्गतको कसुर भएको हुँदा निजहरूलाई बिगो ३ लाख ५० हजार रुपैयाँ कायम गरी बिगोबमोजिम जरिवाना गरी बिगोसमेत जफत हुन मागदाबी लिई आज विशेष अदालत, काठमाडौँमा आरोपपत्र दायर गरिएको प्रवक्ता नरहरि घिमिरेले जानकारी दिएका छन् ।
