काठमाडौं । व्यक्तिको जग्गामा अस्पतालको संरचना बनाएको भन्ने विवादपछि बूढानीलकण्ठ नगर अस्पतालको टहरा भत्काइएको छ ।
बूढानीलकण्ठ नगरपालिकाले व्यक्तिको जग्गा मिचेर नगर अस्पतालको टहरा बनाएको भन्दै काठमाडौं जिल्ला अदालतमा मुद्दा परेको थियो ।
अदालतको अवहेलना मुद्दामा जेठ १३ गते काठमाडौँ जिल्ला अदालतले फैसला गर्दै ६० दिनभित्र टहरा भत्काउन आदेश दिएको थियो ।
जिल्ला अदालतका न्यायाधीश डा। राजेन्द्र कुमार आचार्यको इजलासले मेयर मिठाराम अधिकारीसहित वडाध्यक्षहरू नवराज भट्टराई, सुमन तामाङ र चन्द्रमान श्रेष्ठलाई ६० दिनभित्र टहरा नभत्काए एक महिना कैद बस्नुपर्ने सजाय सुनाएको थियो ।
बूढानीलकण्ठ नगरपालिका वडा नं १० मा निर्माणाधीन नगर अस्पतालको टहरा व्यक्तिको जग्गामा बनाएको र सो टहरा हटाउन यसअघि दिएको आदेश उल्लंघन गरेको अदालतको ठहर छ।
अदालतको आदेशपछि तोकिएकै समयभित्र नगरपालिकाले टहरा भत्काएको वडा नं १० का वडाअध्यक्ष नवराज भट्टराईले जानकारी दिए । यद्यपी नगरपालिकाले भने अस्पतालको संरचना बनेको जग्गा व्यक्तिको नभई सार्वजनिक भएको जिकीर गरेको छ ।
‘हामीले सम्मानित अदालतको फैसलालाई सम्मान गर्दै तोकेकै समयमा टहरा भत्काएका छौँ’ वडाअध्यक्ष भट्टराईले युगदर्शनसँग भने, ‘तर, अस्पतालको संरचना बनेको जग्गा व्यक्तिको नभएर सार्वजनिक हो भन्ने कुरामा नगरपालिका स्पष्ट छ । जिल्ला अदालतको फैसलाविरुद्ध नगरपालिकाले उच्च अदालतमा पुनरावेदन गरिसकेको छ ।’
वडाअध्यक्ष भट्टराईका अनु्सार सार्वजनिक जग्गामा नगर अस्पतालले संरचना बनाइसकेपछि जग्गाको लालपुर्जा व्यक्तिलाई दिँदा समस्या आएको हो ।
यद्यपी काठमाडौं जिल्ला अदालतले भने विपक्षीको जिकीरलाई स्वीकार गर्दै व्यक्तिको जग्गामा अस्पतालका संरचनाका बनाएको ठहर गरेको छ ।
विवादित क्षेत्रमा रहेका संरचनाहरू हटाउनको लागि १०० दिनको समयसहित यसअघि जिल्ला अदालतबाट २०८०–१८ मा चलान दिएकोमा संरचना नहटाउने कार्यले अदालतको फैसला सम्मान नगरेको देखिन आएको अदालतको जिकिर छ ।
‘प्रतिवादीहरूले ६० दिनमा संरचना हटाई नलगेमा अदालतबाट संरचना हटाई दिन लाग्ने खर्च प्रतिवादीहरू मध्ये बूढानीलकण्ठ नगरपालिकाबाट असुल गर्नु,’ जेठ १३ गतेको फैसलामा भनिएको छ।
माथि उल्लिखित कैदका हकमा प्रतिवादीहरूले अब ६० दिनभित्र संरचना हटाई निवेदक एवं वादीलाई चलन दिई कब्जा छाडि दिएको प्रतिवेदन पेस गरेमा उक्त कैद असुल गर्न नपर्ने फैसलामा सर्त राखिएको छ।
