काठमाडौं । सर्वसाधारणको बचत रकम ठगी भएका २९ वटा सहकारीमध्ये १२ वटा एउटै व्यत्ति सञ्चालक रहेको पाइएको छ ।
सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिको बैठकमा समितिका सभापति सूर्यबहादुर थापाले सो जानकारी दिएका हुन्।
उनले समितिले छानबिन गर्नु पर्ने २९ वटा सहकारीमा १२ वटा एउटै मानिसको भेटिएको बताए।
थापाले भने, ‘छानबिन गर्नुपर्ने २९ वटा सहकारीमा १२ वटा एउटै मानिसका सहकारी छन्। १७ वटा सहकारीमा १७ थरिका औतारी छन्। ती सहकारी होइनन्। ती सहकारी कसले दर्ता गरे खोजिका विषय भएका छन्।’
उनले १२ वटासम्म एउटै मानिसको नाममा सहकारी दर्ता गरिनु खोजिको विषय भएको बताए।
समितिले सहकारी अभियान्ताहरुसँगको छलफलमा बोल्दै सभापति थापाले काठमाडौंको टोल–टोलमा बैंकका शाखा रहेकाले सहकारी आवश्यक नभएको बताए ।
बचत परिचालनको निम्ति सहकारी नै नचाहिने उनको भनाई थियो ।
सरकारले २०७७÷०७८ अगाडि नै ७५३ पालिकामा बैंकहरुका एउटा शाखा पुर्याउनुपर्छ भन्ने नीति अनुसार बैंकहरुको पहुँच बढाएको उनले बताए ।
सभापति थापाले सहकारीमा १४ करोडसम्म बचत गर्ने गरेको पाइएको भन्दै १४ करोडसम्म सहकारीमा बचत गर्नु गैरकानूनी भएको स्पष्ट पारे।
उनले १० लाख भन्दा बढी बचत र १० लाख बढी फिर्ता गर्न बैंकमा नपाइने व्यवस्था हुने अनि सहकारीहरुले पाइने विषय राम्रो नभएको बताए।
सुशासनको सन्दर्भमा सबै सहकारी अभियान्ताहरुले बचाएर ल्याएको सहकारी केही ठगीहरुले बिगारेको उनको भनाई थियो ।
