काठमाडौं । पूर्वभूमिसुधार राज्यमन्त्री रामचन्द्र रायको हत्या भएको छ । ८० वर्षीय रायको गएराति करिब १ बजे सर्लाहीको चन्द्रनगर गाउँपालिका–१ रतनपुरस्थित आफ्नै निवासमा हत्या भएको जिल्ला प्रहरी कार्यालय सर्लाहीले जनाएको छ ।
घरमा एक्लै सुतेको बेला राति १ बजे धारिलो हतियारले टाउकोमा प्रहार गरी उनको हत्या भएको अवस्थामा शव फेला परेको जिल्ला प्रहरी कार्यालय सर्लाहीका डीएसपी दीपक श्रेष्ठले जानकारी दिए।
घटनास्थलमा अहिले प्रदेश प्रहरी कार्यालय जनकपुरबाट मधेस प्रदेशका डीआईजी यज्ञविनोद पोखरेल र सर्लाहीका एसपी रवीन्द्रबहादुर सिंहसहितको प्रहरी टोली पुगेको छ।
घटनास्थलमा हत्यामा प्रयोग भएको एउटा धारिलो हतियार फेला परेको छ। तालिमप्राप्त कुकुरसहित प्रहरीले अनुस्न्धान गरिरहेको छ ।
प्रहरीले मुचुल्का उठाएर शव पोष्टमार्टमका लागि सर्लाही सदरमुकाम मलंगवास्थित प्रादेशिक अस्पतालमा लगेको छ। अहिलेसम्म कोही पनि पक्राउ परेका छैनन् ।
राय करिब ३० वर्षअघि राप्रपाबाट तत्कालिन सरकारको भूमिव्यवस्था राज्यमन्त्री भएका थिए। उनी अहिले पनि राप्रपामै आवद्ध थिए ।
रायका पत्नी र छोरा बुहारी काठमाडौँमा बस्ने गरका स्थानीयले बताएका छन्।
घरमा एक जना कामदार र उनी मात्रै बस्ने गरेको स्थानीयले बताएका छन् ।
