काठमाडौं । नवनियुक्त प्रधानमन्त्री केपी शर्मा ओलीको मन्त्रिमण्डलका सबै मन्त्रीहरूले कार्यभार ग्रहण गरेका छन् ।
प्रधानमन्त्री ओलीले प्रधानमन्त्री तथा मन्त्रिपरिषदको कार्यालय र अन्य मन्त्रिले आ–आफ्नो विभागीय मन्त्रालयमा पुगेर कार्यभार सम्हालेका हुन् ।
मन्त्रालयमा सबै मन्त्रीलाई कर्मचारीले स्वागत गरेपनि कृषि मन्त्रालयको दृश्य भने फरक देखियो ।
कार्यभार सम्हाल्न मन्त्रालय पुगेका नवनियुक्त कृषिमन्त्री रामनाथ अधिकारीले मन्त्रालय पुग्नासाथ कार्यभार सम्हाल्न पाएनन् । उनलाई आन्दोलनरत कर्मचारीले अवरोध गरे ।
कर्मचारीको आन्दोलनका कारण भित्र छिर्न नपाएपछि उनी केहीबेर क्यान्टिनमा बसेर फर्किएका थिए। लगत्तै कर्मचारीको आन्दोलन सकिएपछि मन्त्री अधिकारीले पदभार ग्रहण गरे ।
कृषि मन्त्रालयको गेटमा मूलगेटमै धर्ना बसेका राजपत्रांकित तेस्रो श्रेणाीका प्राविधिकले धर्ना गरिरहेका थिए।
कार्यभार सम्हाल्दै उनले आफूले सो बारेमा गहन अध्ययन गर्ने र त्यसका लागि समय माग गरे । उहाँले आफूले पहिलो प्राथमिकतामा राखेर समस्या समाधान गर्ने बताए ।
उनले भने, ‘अहिले क्याबिनेट बस्दैछ । तपाईंहरुका समस्याहरु मैले सुनेँ । तर यसलाई राम्रो ढंगबाट अध्ययन गरेर निर्णय लिनेछु । पहिलो प्राथमिकतामा राखेर यो म अध्ययन गर्नेछु । केही समय दिनुस्, समस्याको समाधान गर्न म तयार छु । समय दिनुस्, साथमा म रहनेछु ।’
