शशि सापकोटा, तौलिहवा ।
दुई सय एघारौँ भानु जयन्तीको उपलक्ष्यमा कपिलवस्तुको बाडगङ्गा नगरपालिका–५ झन्डा मदौलीमा वृक्षारोपण गरिएको छ ।
नगरप्रमुख चक्रपाणि अर्यालको प्रमुख आतिथ्यमा २०८१ असार २९ गते वृक्षारोपण गरिएको हो ।
श्री माध्यमिक विद्यालय झन्डाको आयोजनामा नगरपालिकाको हरित विद्यालय प्रवर्तन कार्यक्रमअन्तर्गत सम्पन्न सो कार्यक्रममा मन्तव्य राख्दै नगरप्रमुख अर्यालले यस्तो कार्यक्रमले विद्यालयको सौन्दर्य बढ्ने र वातावरणमैत्री हरित विद्यालयको विकास हुने बताउनुभयो ।
गुणस्तरीय शिक्षामा जोड दिँदै उहाँले यो विद्यालय नगरको अब्वल विद्यालय रहेको र अझ बढी शैक्षिक विकासका लागि सबै क्षेत्र सक्रिय रहनुपर्ने कुरामा जोड दिनुभएको थियो ।
कार्यक्रममा नगर शिक्षा प्रमुख खेमबहादुर जिसी, वडा नम्बर ५ का वडाअध्यक्ष दुनिकाप्रसाद भुसाल, वडासदस्य बुद्ध थारू, शिक्षक अभिभावक सङ्घका अध्यक्ष ध्रुव विक, टोल शिक्षा समितिका संयोजक हरिप्रसाद पोखरेल तथा विद्यालय क्याचमेन्टभित्रका टोल विकास समितिका अध्यक्ष तथा सचिव, विद्यालय व्यवस्थापन समितिका सदस्य, विद्यालय शिक्षक परिवार तथा अभिभावकको बाक्लो उपस्थिति थियो ।
कार्यक्रममा सहभागीलाई स्वागत मन्तव्यबाट विद्यालयका प्रअ कृष्ण श्रेष्ठ टन्डनले गर्नुभएको थियो भने अध्यक्षता विद्यालय व्यवस्थापन समितिका अध्यक्ष शशि सापकोटाले गर्नुभएको थियो ।
कार्यक्रमको सञ्चालन शिक्षक नारायणप्रसाद पौडेलले गर्नुभएको थियो ।
मन्तव्यपश्चात् प्रमुख अतिथिले विष्णु वृक्ष र सदाबार फूलका बिरुवा रोप्नुभएको थियो । सो क्रममा उपस्थित अतिथि, शिक्षक, विद्यालयका विभिन्न समितिका प्रतिनिधिहरूले पाँच/पाँचओटा विभिन्न प्रजातिका करिब सयओटा बिरुवा रोप्नुभएको थियो ।
