विष्णु शर्मा ##

“भगवान्” ले जिते देशमा कायापलट हुन्छ भन्थे
देशमा विकासले आकाश पनि छुन्छ भन्थे ।
उहाँको विरोध गर्नेलाई पिट्नैसम्म आउथे
आँखा बन्द गरी चर्का चर्का नारा लाउथे ।।

“भगवान्” ले भारी मतको अन्तरले नै जित्नुभयो
विकासको मूल फुटाउँछु भनी झ्याली पिट्नुभयो ।
दुई दुईपटक उप अनि गृहमन्त्री पनि बन्नुभयो
भ्रष्टाचारीका फाइल धमाधम खोलिन्छन् भन्नुभयो ।।

परदेशिएका युवालाई देशमै फर्काउने रे !
सीमाअतिक्रमणकारीलाई सीमामै पड्काउने रे !
एमसिसीको नायकलाइ डाडै कटाउने रे !
निर्मलाको हत्यारालाई पत्ता लगाउने रे !

सोझा र निमुखा जनताले भारी आशा गरे
परदेशिएका युवा देश फर्कन ठिक्क परे ।
तर जनताको आशा निराशामा नै बदलियो
उनीहरूको जीवनमा बलेन आशाको दियो ।।

उहाँको पनि उद्देश्य थियो सत्तामा नै जाने
मन्त्रीको भागबन्डा लगाई बाडीचुडी खाने ।
न त खुले भ्रष्टाचारका फाइल न परदेशी फर्के
“भगवान्” को विश्वास घातले मन मात्र धर्के ।।

बाघको जस्तो दहाड “भगवान्” को पहिले
रुझेका बिरालासरी हुनुभयो अहिले ।
बाबाआमा भन्छन् ठुलो मेघले पानी पर्दैन
बादलबिनाको गर्जनले केही गर्दैन ।।

बाबाआमाको यो भनाइ सत्य भयो आज
हाम्रो देशमा जहिलेसुकै लुटेराको राज ।
स्वार्थपूर्ति गर्नलाई फेरिन्छन् सरकार
छैन उनलाई देश र जनताको दरकार ।।

समिकरणमा आउँदै छन् एमाले र काङ्ग्रेस
प्रतिगमनको खतरामा पर्ने छ फेरि देश ।
दुःख भयो जनतालाई नेता नचुनिँदा छानी
जहिलेसुकै बस्नुपर्छ पश्चाताप मानी ।।