काठमाडौँ । नेपालमा कोरोना सङ्क्रमितको सङ्ख्या ५१ पुगेको छ । आइतबार थप दुई जनामा सङ्क्रमण पोजेटिभ देखिएसँगै सङ्क्रमितको सङ्ख्या ५१ पुगेको हो ।
स्वास्थ्य तथा जनसङ्ख्या मन्त्रालयका अनुसार आइतबार राष्ट्रिय जनस्वास्थ्य प्रयोगशालामा परीक्षण गरिएका नमुनामध्ये दुई जनाको पोजेटिभ देखिएको छ । सङ्क्रमित दुबै जना पर्साको वीरगञ्ज ५० वर्षीय पुरुष हुन् । अहिले उनीहरूको उपचार भइरहेको छ ।
आइतबार चार जना सङ्क्रमित उपचारपछि निको भएर घर फर्किएका छन् । नारायणी अस्पताल वीरगञ्जमा उपचाररत रौतहटका १८ वर्षीय पुरुष एक जना बाह्रौँ दिन र तीन जना भारतीय नागरिक तीन जना पुरुष १५ दिनमा डिस्चार्ज भएको स्वास्थ्य तथा जनसङ्ख्या मन्त्रालयका प्रवक्ता डा. विकास देवकोटाले बताउनुभयो । उनीहरु छपकैयाको मक्की जामे मस्जिदमा बस्दै आएका थिए ।
योसँगै निको भएर घर फर्किनेहरूको सङ्ख्या १६ पुगेको छ । सरकारले प्रदेश नम्बर २ मा परीक्षणको दायरा थप बढाएको छ । प्रदेशका आठ वटै जिल्लामा नमुना परीक्षणका लागि एक हजार २७ वटा नमुना सङ्कलन भएका छन् । सङ्कलित नमुनाहरूको परीक्षण जारी रहेको प्रवक्ता देवकोटाले बताउनुभयो । सबैभन्दा बढी सङ्क्रमित देखिएको उदयपुरबाट पछिल्लो पटक तीन सय ३७ जनाको नमुना परीक्षणका लागि सङ्कलन भइरहेको छ ।
आइतबारसम्म ५१ हजार तीन सय ६७ वटा नमुना परीक्षण भएका छन्, जसमा पी.सी.आर. विधिबाट नौ हजार नौ सय ३१ र आर.डी.टी. विधिबाट ४१ जहार चार सय ३६ वटा नमुना परीक्षण भएका छन् । पछिल्लो २४ घण्टामा दुबै विधिबाट दुई हजार ९६ वटा परीक्षण भएका छन् । प्रदेश नम्बर १ मा चार हजार तीन सय आठ, प्रदेश नम्बर २ मा पाँच हजार एक सय ४१ र बागमती प्रदेशमा सात हजार पाँच सय ९१ जनाको नमुना परीक्षण गरिएको छ । यसैगरी गण्डकी प्रदेशमा चार हजार नौ सय २४ प्रदेश नम्बर ५ मा तीन हजार तीन सय २६, कर्णाली प्रदेशमा चार हजार नौ सय ७४ र सुदूरपश्चिम प्रदेशमा ११ हजार एक सय ७२ जनाको आर.डी.टी. विधिबाट नमुना परीक्षण गरिएको छ । १७ हजार २५ जना अहिले क्वारेन्टिनमा रहेका छन् । काठमाडौँ उपत्यकामा छ र बाहिर एक सय चार गरी एक सय १० जना अहिले आइसोलेसनमा रहेका छन् ।
