काठमाडौं । काठमाडौंबाट दोलखा जाँदै गरेको बस बुधबार बिहान रामेछापमा दुर्घटना हुँदा १५ जना घाइते भएका छन् । एक जनाको अवस्था गम्भीर छ ।
कोरोना महामारीका कारण काठमाडौंबाट आफ्नो घर दोलखा फर्किंदै गरेका ३९ जना चढेको बा २ ख ६८१८ नम्बरको मिनीबस रामेछापको मन्थली नगरपालिका–६ कुनौनी भन्ने स्थानमा ब्रेक फेल भएर सडकमै पल्टिएको हो ।
जिल्ला प्रहरी कार्यालय रामेछापका अनुसार दुर्घटनामा १५ जना घाइते भएका छन् । तीमध्ये गम्भीर घाइते एक जनालाई उपचारका लागि काठमाडौं रिफर गरिएको छ । दुर्घटनामा हात भाँचिएकी दोलखाको तामाकोसी–३, जामुनेकी ४६ वर्षीया इन्दिरा पोखरेललाई थप उपचारका लागि काठमाडौंको ट्रमा सेन्टर रेफर गरिएको हो।
अन्य ३ घाइतेको भने मन्थलीकै तामाकोसी सहकारी अस्पतालमा उपचार भइरहेको छ । दोलखाको मालु–४ निवासी ढालकाजी योगीकी ४ वर्षीया छोरी हर्षिका योगी, सोही ठेगानाकी २७ वर्षीया सिर्जना योगी र रामेछापको मन्थली–१३ निवासी २५ वर्षीया गीता खड्काको त्यहाँ उपचार भइरहेको हो । अन्य सामान्य घाइते उपचार पछि घर फर्किसकेका प्रहरीले जनाएको छ ।
