काठमाडौं । सत्तारुढ दल नेकपा (एकीकृत समाजवादी) का अध्यक्ष माधवकुमार नेपाल विपक्षी दलका शिर्ष नेताहरूको बैठकमा सहभागी भएका छन् ।
बुधबार नेपाली कांग्रेसका सभापति शेरबहादुर देउवाले आफ्नै निवास बूढानीलकण्ठमा विपक्षी दलहरूको बैठक बोलाएका हुन् ।
जसमा जनता समाजवादी पार्टीका अध्यक्ष उपेन्द्र यादव, लोकतान्त्रिक समाजवादीका अध्यक्ष महन्थ ठाकुरसँगै एकीकृत समाजवादीका अध्यक्ष माधव नेपाल सहभागी भएका लोसपाका नेता सरतसिंह भण्डारीले जानकारी दिए ।
नेपाल सांसद मेटमणि चौधरीलाई लिएर बूढानीलकण्ठ पुगेका थिए ।
मंगलबार आगामी आर्थिक वर्षको बजेट संसद्मा पेश भइसकेको अवस्थामा देउवाले प्रतिपक्षी दल नेताहरूलाई बोलाएका थिए ।
देउवा निवासमा सहकारी छानबिन समिति, बजेट र मधेस सरकारबारे छलफल भएको बताइएको छ ।
पछिल्लो समय माधव नेपाल सत्ता समीकरणसँग असन्तुष्ट रहेको खबर आइरहेको बेला देउवासँग प्रतिपक्षी नेताहरूसहित सहभागी हुनुलाई अर्थपूर्ण रुपमा लिइएको छ ।
