केरसिंह अदै, तौलिहवा ।
राष्ट्रिय जनमोर्चा कपिलवस्तुले हुमबहादुर खत्रीको निधन भएको नवौँ दिन शोकशभा सम्पन्न गरेको छ ।
खत्रीका कान्छा भाइ दलबहादुर खत्रीको अध्यक्षतामा २०८१ जेठ १३ गते आइतबार शोकसभा सम्पन्न भएको हो ।
कार्यक्रममा राजमो कपिलवस्तुका सचिव तथा अखिल नेपाल ट्रेड युनियन महासङ्घ (अन्टुक) का केन्द्रीय सदस्य केरसिंह अदैले मन्तव्य राख्दै एक असल योद्धा गुमाउनुपर्दा पार्टीलाई क्षति पुगेको बताउनुभयो ।
त्यस्तै, नेकपा (मसाल) कपिलवस्तुका प्रवक्ता माधव भाटक्षेत्रीले मन्तव्य राख्दै स्मृतिशेष खत्रीको योगदान, सङ्घर्ष, पार्टीले कहिल्यै नभुल्ने तथा उहाँको सपना पूरा गर्न निरन्तर सङ्घर्ष जारी राख्ने प्रतिशद्धता व्यक्त गर्नुभयो ।
शोकसभामा राजमा केन्द्रीय सल्लाहकार दधिराम आचार्य, अखिल नेपाल किसान महासङ्घका उपाध्यक्ष शिव पौडेल, राजमो जिल्ला अध्यक्ष रामप्रसाद बेल्बासेलगायत नेताकार्यकर्ताको उपस्थिति थियो ।
स्मृतिशेष खत्रीको फोटोमा फूल, अबिर माल्यार्णपण गरी अघि बढेको सो कार्यक्रमको सञ्चालन प्रगतिशील पत्रकार सङ्घका सल्लाहकार शशि सापकोटाले गर्नुभएको थियो ।
स्मृतिशेष खत्री २०५६ सालदेखि अर्घाखाँची भूमिकास्थानबाट बसाइँ सरी कपिलवस्तु वाणगङ्गा आउनुभएको थियो । उहाँ कपिलस्तुमा राजमो जिल्ला सदस्य पदमा रही विभिन्न आन्दोलनमा सरिक हुनुहुन्थ्यो ।
मिर्गौला र मधुमेहबाट पीडित खत्रीको परिवारमा पत्नी, दुई छोरा र एउटी छोरी हुनुहुन्छ ।
