काठमाडौं । काठमाडौं महानगरपालिकाका मेयर बालेन्द्र शाहले सिंहदरबार र नेताका घरको फोहोर नउठाउने धम्की दिएपछि महानगरका फोहोरको गाडी बोक्ने ट्रक चालक रिहा भएका छन् ।
सोमबार नेकपा माओवादी केन्द्रको मुख्यालयमा थुपार्न चार ट्रक फोहोर लैजानेक्रममा चालकलाई प्रहरीले गिरफ्तार गरेको थियो।
लगत्तै मेयर बालेन्द्रले सिंहदरबार र नेताका घरको फोहोर नउठाउने चेतावनी दिएका थिए ।
उपत्यकाको फोहोर विसर्जन हुँदै आएको बन्चरेडाँडा क्षेत्रमा फेरि अवरोध हुन थालेपछि काठमाडौँ महागरपालिका प्रमुख बोलेन्द्र शाह आक्रोशित छन्। आफूलाई असफल पार्न पुराना राजनीतिक दलका नेता–कार्यकर्ताले निहुँ खोजेको उनको बुझाइ छ।
सोही कारण उनले सांकेतिक विरोधस्वरूप प्रधानमन्त्री पुष्पकमल दाहाल प्रचण्ड अध्यक्ष रहेको पार्टी माओवादी केन्द्रको पेरिसडाँडास्थित मुख्यालयमा चार ट्रक फोहोर विसर्जन गर्न निर्देशन दिएका थिए ।
बालेनको निर्देशनअनुसार फोहोर लैजान लागेका ट्रक चालकलाई प्रहरीको नियन्त्रणमा लिएको थियो ।
ट्रक चालकलाई प्रहरीले नियन्त्रणमा लिएपछि महानगर प्रमुख शाह थप आक्रोशित भए।
उनले ती चालक ससम्मान रिहा नभएसम्म सिंहदरबार, सबै पार्टी कार्यालय र नेताका घरको फोहोर नउठाउने चेतावनीसमेत दिए।
उनले सामाजिक सञ्जालमा लेखे, ‘भ्रष्टलाई समाउन सक्नुभएन, काठमाडौँमा फोहोर बोक्ने चार चालकलाई समाउनुभएछ यो सरकारले। जबसम्म ससम्मान चालकहरू रिहा हुन्नन्, सिंहदरबारलगायत सबै पार्टी कार्यालयको र नेताहरूको घरको फोहोर उठ्दैन। कोको जुध्न आउने हो, आए हुन्छ। कसैलाई बाँकी छोडिँदैन।’
बालेन्द्रको चेतावनीपछि सरकारले ती ट्रक चालकलाई रिहा गरेको छ ।
गाडी चालक रिहा भएपछि बालेन्द्रले पुनः सामाजिक सञ्जालमा लेखेका छन्, ‘जो कोहीले यत्ति बुझ्नुहोला। पदमा तलमाथि होला, भूमिकामा तलमाथि होला। तर नियम, कानून र भूमिकामा बस्ने हरेक कर्मचारीको, हरेक महानगरबासीको आत्मसम्मान हुन्छ। त्यसमा कसैले सम्झौता गर्न पाइँदैन।’ उनले चेतावनी दिँदै भनेका छन्, ‘आफ्नो कर्तव्य निभाई रहेका आफ्ना कुनै कर्मचारी अनाहकमा अपमान महानगरले सहँदैन। बुझेर कदम चाल्नुहोला।’
यसअघि शाहले फोहोर व्यवस्थापनमा सहयोग नगरेको भन्दै केही समय सिंहदरबारसहित विशिष्ट पदाधिकारीका निवासको फोहोरसमेत उठाउन रोकिदिएका थिए।
यस्तै, शाहले सिंहदरबारमा आगो लगाइदिने चेतावनीसमेत दिएका थिए ।
