काठमाडौँ । नेपाली काङ्ग्रेसका महामन्त्री गगन थापाले राष्ट्रिय स्वतन्त्र पार्टीका सभापति तथा गृहमन्त्री रवि लामिछानेप्रति व्यङ्ग्य गर्दै भनेका छन्– ‘मेरो हातमा घण्टी छ भनेर कसैले छुट पाउँदैन’ ।

सङ्घीय संसद् नयाँ बानेश्वरको ल्होत्से हलमा २०८१ जेठ ६ गते आइतबार साँझ पत्रकार सम्मेलन गर्दै उनले सो अभिव्यक्ति दिएका हुन्।

‘हिँजो पनि विभिन्न जिम्मेवार व्यक्तिहरूमाथि प्रश्न उठ्दा छानबिन भएको हो, आज पनि हुनुपर्छ’ उनले भने– ‘हिजो जनार्दन शर्मा, रामशरण महत, नारायणकाजी श्रेष्ठलगायतमाथि छानबिन भएको हो र आज पनि हुनुपर्छ ।’

सवाल व्यक्तिको नभएर जिम्मेवारीको भएको बताउँदै उनले अहिले छानबिन हुनुपर्दछ भनेको रवि लामिछानेमाथि होइन, गृहमन्त्रीमाथि भएको स्पष्ट पारे।

संसदीय समितिको कार्यक्षेत्र (टिओआर) को सन्दर्भमा उनले भने– ‘सहकारीमा किन समस्या आएका छन् भनेर संसदीय समितिले छानबिन गर्ने होइन, गृहमन्त्री रवि सम्मिलित सहकारी र गोर्खा मिडियाको प्रसङ्गमा छानबिन गर्ने हो ।’

संसदीय समिति नबने संसद् चल्दैन

महामन्त्री थापाले भोलि ११ बजेभित्र संसदीय समिति बनाउने निर्णय गरेर आउन सत्तापक्षसित आग्रह गर्दै भने ‘नत्र संसद्का कुनै कारबाही अघि बढ्दैन, विश्वासमतको कारबाही पनि अगाडि बढ्दैन ।’

गृहमन्त्री रविले आफूमाथि प्रश्न उठाएको सन्दर्भमा आफू त्यसका लागि तयार रहेको स्पष्ट पारे।

‘गृहमन्त्रीजीले मेरा विषयमा पनि प्रश्न उठाउनुभयो’ थापाले भने– ‘मेरो विषयमा पनि छानबिन बनाए हुन्छ । सत्तापक्षको मात्रै समिति बनाए हुन्छ अथवा रास्वपाको मात्रै संसदीय समिति बनाए पछि हुन्छ ।’

‘नोस्टाल्जिक’ नहुनुस्

गृहमन्त्रीलाई ‘नोस्टाल्जिक’ नहुन आग्रह गर्दै थापाले भने– ‘म उहाँलाई नोस्टाल्जिक नहुन आग्रह गर्दछु । उहाँ अहिले मिडियाकर्मी होइन, गृहमन्त्री हो । उहाँ विगतमै रमाउन मिल्दैन ।’

केही दिनअगाडि आफू विरुद्धको अभियोग प्रमाणित भए राजनीति छोड्ने गृहमन्त्री रविको प्रसङ्ग जोड्दै काङ्ग्रेस नेता थापाले जोडे– ‘आफू गलत भए राजनीतिक छाड्ने होइन नि, सजाय हुने हो ।’

‘उहाँले राजनीति छोड्ने कुरा गर्नुभयो’ उनले भने– ‘त्यसो होइन नि । उहाँ गलत भए उहाँले सजाय पाउने, म गलत भए मैले सजाय पाउने हो । राजनीति छोड्ने कुरा कहाँ हुन्छ ?’

पहिला सहकारी र मिडियामा, अहिले सरकारमा

पत्रकार सम्मेलनको क्रममा उहाँले पत्रकारतर्फ लक्षित गर्दै केही सहकारी र मिडिया सञ्चालक एउटै समूह भएर अहिले सत्तासिन भएकोमा खोजी गर्न आग्रह गरे।

‘तपाईंहरूले देख्नुभएको छ, केही सहकारीका सञ्चालक मिडिया सञ्चालन गरिरहेका छन्, केही मिडिया सञ्चालन सहकारीमा पनि छन्’ उनले भने– ‘आज त्यही समूह सरकार पनि चलाऔँ न भनेर सत्तामा आइपुगेका छन् ।’

उनले पत्रकार जगत्लाई यस विषयमा खोजबिन गर्न आग्रह गरे ।