हेम बिजी ##

मध्यरातमा
फेरि सरकार ढल्यो
दैनिक अखबरले खबर छाप्यो
रेडियोले समाचार फुक्यो
र टेलिभिजनले दृश्य देखायो
किनकि
सिंहदरबारको पर्खालभित्र
उभिनै नसक्ने
पाउहरू नभएको सत्ता थियो
पैतला नभएको सरकार थियो
र त्यसैले
उभिनै नसकेर सरकार ढल्यो

इतिहासकार भन्दै थिए–
कुनै समय
सिंहदरबारको पर्खालभित्र
उभिन सक्ने
पाउ भएका सत्ता पनि थिए
पैतला भएका सरकार पनि थिए
तर आज तिनै
इतिहासकार भन्दै छन्
सत्तासँग पाउ छैनन
सरकारसँग पैतला छैनन्
र त्यसैले
उभिनै नसकेर सरकार ढल्यो

आज
साँचो बोल्दै छन् व्यापारी
सत्ताका पाउ
तस्कर बचाउन बेचे
सरकारका पैतला
लुटेरा जोगाउन बेचे
आज साँचो बोल्दै छन् व्यापारी
सत्ताका पाउ
कतै डलरमा बेचे
सरकारका पैतला कतै
रुपैयाँमा बेचे
र त्यसैले
उभिनै नसकेर सरकार ढल्यो

ए लङ्गडा शासक
तस्कर बचाउन पाउ नबेच
लुटेरा जोगाउन पैतला नबेच
किनकि देश उठाउन
आफू उभिनुपर्छ
आफू उभिन पाउ र पैतला चाहिन्छ
त्यसैले किन बेच्छौ पाउ र पैतला
उभिन नसकेर
दिनदिनै सरकार ढल्यो
त्यसैले पाउ नभएका सत्ता नबनाऊ
पैतला नभएका सरकार नबनाऊ