बुटवल । प्रदेश नं ५ का सांसद तारा जिसीले सीमामा हजारौं नेपाली नागरिक कैयौं दिनदेखि भोकै प्यासै रहेकोप्रति सरकारले वेवास्ता गरेको भन्दै आक्रोश पोख्नुभएको छ । राष्ट्रिय जनमोर्चाका सांसद जिसीले नेपाली सञ्चार माध्यमले सीमामै पुगेर अलपत्र नेपालीको पीडा सार्वजनिक गरिरहेपनि सरकार त्यसप्रति बेखबर रहेको गुनासो गर्नुभयो ।
शनिबार बुटवलमा मुख्यमन्त्री शंकर पोखरेलले आयोजना गरेको दलका सचेतकहरूसहितको सर्वदलीय छलफलमा राजमो प्रदेश सांसद जिसीले सीमामा क्वारेन्टिनमा अबधि पूरा गरी सकेका नेपाली नागरिकलाई आवश्यक चेकजाँच गरि घर पठाउन ब्यवस्था गर्नुपर्ने र अलपत्र परेका नेपाली नागरिकलाई नेपाल भित्राई प्रदेश, जिल्ला वा स्थानीय तहमा जहाँ हुन्छ क्वारेन्टिनमा राख्ने ब्यवस्था गर्न माग गर्नुभयो।
भारतमा पनि लकडाउन कायम रहेको अवस्थामा कसरी नेपाली नागरिक सीमाक्षेत्रमा ठूलो संख्यामा पुगिरहेका छन्रु ? भन्ने प्रश्न गर्दै जिसीले धेरै नेपाली क्वारेन्टिनमा नहुनु र भोकैप्यासै रहन बाध्य हुनु दुःखद भएको बताउनुभयो । उहाँले नेपाली मजदुरप्रति नेपाल र भारत दुबै सरकारले गरेको अमानवीय कार्यको जति निन्दा गरेपनि कम हुने बताउनुभयो ।
‘हप्तौंसम्म लामो दूरी पार गरेर आपत विपद झेल्दै देसको सीमामा आएपुग्दा झन् ठूलो विपत बेहोर्न बाध्य सुत्केरी महिला बाल बालिका र आम नागरिकको तत्काल उद्दार गरियोस्’ सांसद जिसीले भन्नुभयो ।
यस्तै, उहाँले उपत्यका र देशका विभिन्न साना ठूला शहरहरूबाट घर फर्कनेहरूको जताततै लर्को देखिएको बताउँदै लामो यात्रा पैदलै तय गरिरहेको नागरिकलाई गन्तव्यमा पुरे्याइदिनुपर्ने बताउनुभयो ।
सांसद जिसीले प्युठान जिल्ला अस्पतालमा १० आईसोलेसनको तयारी रहेपनि २ वटा मात्र सम्भव भएको, प्राथमिक उपस्वास्थ चौकी भृग्री र खलंगा लगायत जिल्ला र प्रदेशका स्वास्थ संस्थाहरूमा प्रर्याप्त मात्रामा स्वास्थ समाग्री नहुँदा स्वास्थकर्मीहरूले जोखिमपूर्ण सेवा दिनु परेको गुनासो समेत गर्नुभयो ।
आवश्यक स्वास्थ समाग्रीको प्रदेश भित्र कमि हुन नदिने आश्वासनको साथै बैठकमा निर्माणाधीन पूर्वाधारहरू दर्जनौं सडकपुलको साथै ढाँड–सेउलीघारि सडकपुल निर्माणमा पनि लकडाउनको असर भएको उठाए पछि मुख्यमन्त्रीले सामान ल्याउन लकडाउनले कुनै असर नगर्ने त्यसबारे आफूले बुझ्ने बताउनुभयो ।
बैठकमा नेकपा का प्रमुख सचेतक भुमिश्वर ढकाल, नेपाली कांग्रेसकी उपसचेतक निर्मला क्षेत्री, समाजवादी पार्टी का सचेतक सन्तोष पाण्डे लगायत नेताहरुले आ–आफ्नो धारणा राख्नुभएको थियो ।
