दाङ । राष्ट्रिय जनमोर्चा, जिल्ला समिती दाङ देउखुरीले आफ्नो घर जान कैयौं दिनदेखि पैदल हिँडिरहेका नागरिकहरुको उद्दार गर्न सरकारसँग माग गरेको छ । आइतबार एक प्रेस विज्ञप्ति प्रकासित गरी राजमोले काम गरिरहेको ठाउँमा खाने बस्ने समस्या भएपछि कैयौं नेपाली नागरिक विचल्लीमा परेर सयौं किलोमिटर पैदल हिँडिरहेका भन्दै उनीहरुलाई गन्तव्यमा पुर्याउन सरकारसँग आग्रह गरेको हो ।
राजमो दाङका अध्यक्ष गणेश आचार्यले प्रेसित गर्नुभएको विज्ञप्तिमा भारतमा रहेका नेपालीहरुको व्यवस्थापन गर्न, राहत वितरणमा भइरहेको अनियमितता हटाउन तथा किसानहरुको समस्या समाधान गर्नसमेत माग गरिएको छ ।
विज्ञप्तिमा भनिएको छ, ‘अहिले बिश्व ब्यापी रुपमा नोभेल कोरोना भाइरसको महा आतंक सृजना भइरहेको छ । यसका कारणले मान्छेको जन जीवन धेरै कस्टकर बनिरहेको छ । नेपालमा अहिले सम्म नोभेल कोरोना भाइरसकै कारण मान्छेको मृत्यु नभए पनि दैनिक जीवन धेरै कष्टपुर्ण भएको छ । बिश्वका विभिन्न देशहरुमा श्रमको लागि रहेका नेपालीहरुमा भाइरस संक्रमण बढ्दो क्रममा छ । कैयौंको मृत्यु भैसकेको छ भने ठूलो संख्यामा देश बाहिर रहेका नेपालीहरुको जन जीवन पनि कस्टकर बनेको छ । खासगरी भारतमा कार्यरत नेपाली हरु ठूलो संख्यामा अलपत्र परेर असुरक्षित रुपमा बसेका छ्न । ती नागरिकहरुको उचित ब्यबस्थापन गर्न सरकारको ध्यान जान जरुरी छ ।
अहिले साना किसानहरु ठूलो संकटमा परेका छ्न । कुखुरा पालक किसानहरु ऋणमा खोरमा कुखुरा राखेका छ्न । त्यो कुखुरालाई खुवाउने दाना पाइरहेका छैनन् । जसका कारण कुखुरा मर्ने अबस्था छ । सरकार दाना बोक्न दिए पनि कुखुरा व्यावसायीले कुखुरा बेच्न नपाएको कारण दाना खरीद गर्न सकेका छैनन् । यो समस्यामा धेरै किसानहरु रहेका छ्न् । त्यसैले स्थानीय सरकारले दानाको ब्यबस्थापन गर्ने र किसानहरुलाइ सामाजिक दुरी कायम गर्दै बिक्री गरेर दानाको पैसा लिने बाताबरण निर्माण गर्न जरुरी छ ।
यस्तै, बाटोमा धेरै यात्रीहरु कस्टपुर्ण यात्रा गरीरहेका छ्न । त्यो समस्या समाधान गर्न सरकारको गम्भीर ध्यानाकर्षण हुन जरुरी छ । रोगको डर हुदा हुँदै पनि सजिलो अबस्थाले मान्छे चारा पाच सय किलोमीटरको पैदल यात्रा गरेका छैनन । यो बुझेर समाधानको बाटो निकाल्न जरुरी छ ।
सरकारले दैनिक ज्याला मजदुरी गरेर जिबिकोपार्जन गर्ने नागरिकलाई राहातको प्याकेज ल्यायको छ । यो स्वागतयोग्य कुरा छ । तर राहतमा अनियमितता भएको, वास्तविक समस्या भएकाले नपाएको, समस्या नभएका मान्छेहरु नै राहतमा आएको र नेतृत्वमा भएकाले आफ्ना मान्छेलाई मात्र राहत दिने गरेको कुराहरु आएका छ्न् । जिल्लामा बैठक बसेर वडा अध्यक्षको नेतृत्वमा सर्बदलीय संयन्त्र बनाएर त्यही संयन्त्रले राहत दिन पर्ने मान्छेको अभिलेख तयार गरेर मात्र राहत दिने निर्णय भएपनि कतिपय ठाउँमा त्यसो नगरिको कुरा आइरहेको छ । यसमा सम्बन्धित स्थानीय तहको ध्यान जान जरुरी छ । अन्त्यमा सबै नागरिकहरुलाइ हतोत्साहित नभएर सुरक्षित बस्न र नोभेल कोरोना भाइरस को संक्रमण बाट जोगिन अनुरोध गर्न चाहान्छौ ।’
